Biz ýakynlaşmagy ugur edinýäris

“Senagat Russiýasynyň sanly industriýasy” maslahatynyň çäklerinde kiber durnuklylygy synag etmek hem-de halkara derejesinde tejribe alyşmak üçin sanly ulgam arkaly ýaryş geçirildi.

Iki tapgyrda geçen ýaryşa dürli ýurtlardan 40 topar gatnaşdy. Jemleýji tapgyra Russiýadan, Türkmenistandan we Mýanmadan 7 topar geçmegi başardy.

Kiberçempionatyň dowamynda toparlar möhüm desganyň IT-infrastrukturasyna haker hüjümlerini gaýtarmakda ýaryşdylar. Hakyky kiber howplary gaýtalaýan çylşyrymly wezipeleri çözmek bilen düzüminde 5 hünärmen bolan “Türkmenaragatnaşyk” agentliginiň topary öňde goýlan meseleleriň hötdesinden gelmegi başardy we jemi 2015 utuk toplap, 3-nji orny eýeledi. 1-nji, 2-nji orunlary Russiýanyň toparlary eýelediler.

Ýeňiji toparlara “Solar” döwlet konsernine we kiberçempionatyň tehnologiýa hyzmatdaşlarynyň, “Kod Bezopasnosti” we “Laboratoriýa Kasperskogo” kompaniýalarynyň maglumat howpsuzlygy boýunça önümlerini ulanmaga sertifikatlar gowşuryldy.

Russiýa Federasiýasynyň sanly ösüş aragatnaşyk we köpçülikleýin kommunikasiýalar ministrligi hem-de Rostelekom tarapyndan guralýan halkara kiberçempionat maglumat howpsuzlygy ulgamynda hünärmenleriň özara gatnaşyk ukyp-başarnyklaryny kämilleşdirmek, ählumumy kiberjenaýatçylygy bilen göreşmek boýunça tagallalary utgaşdyrmak hem-de tejribe paýlaşmak arkaly bu ugurdaky hyzmatdaşlygy ösdürmek maksady bilen geçirilýär.

Hünärmenler howplary gaýtarmak, öňdebaryjy tehnologiýalara, gurallara we taktikalara erk etmek boýunça ukyp-başarnyklaryny görkezýärler.

ORIENT news

Foto: gazprom-media.com