Dört bölekli anyklaýjy, ählumumy özboluşlylyk, 28 000 robotyň yzarlanylmagy, 100-den gowrak kärhana we 200-den gowrak önüm modeli.

“CCTV+” teleýaýlymynyň habar bermegine görä, Hytaý Pekinde adamşekilli robotlaryň doly ömüriň dowamyny dolandyrmak üçin ilkinji platformasyny tanyşdyrdy. Bu ulgam ýurtdaky ähli adamşekilli robotlaryň ýygnalan pursadyndan başlap, tä ulanyşdan aýrylýança doly yzarlanylmagyny üpjün edýär.

Indiden beýläk Hytaýda öndürilen her bir adamşekilli robota ýörite, dört bölekli anyklaýjy kod berler. Bu kod barlag-düzüliş işlerinden başlap, önümçilige, satuw rugsadyna, satuwa, ulanyşa, ulanyşdan aýrylýança we gaýtadan işlenilmä çenli ähli tapgyrlaryň yzarlanylmagyna şert döredýär.

Bu ulgam Senagat we maglumat tehnologiýalary ministrliginiň Adamşekilli robotlar we kämilleşen emeli aň boýunça standartlaşdyrma tehniki komiteti tarapyndan işlenip düzüldi. Ulgam robotlara gözegçilik eder, töwekgelçilikleriň öňüni alar we hasabatlylygy ýokarlandyrar.

Hytaýyň Elektronika standartlaşdyryş institutynyň Maglumat tehnologiýalary ylmy-barlag merkeziniň direktory Dun Sýan şeýle düşündirdi: «Kod öz içine ýurduň koduny, kärhananyň koduny, önümiň koduny we seriýa belgisini alýar. Bu robotlaryň ählumumy özboluşlygyny, yzarlanyp bilmegini, görnüşleri boýunça tapawutlandyrylmagyny we her biriniň aýratynlykda yzarlanmagyny kepillendirýär.

Beýleki tarapdan bolsa, ulgam kärhanalar üçin tehniki çeýeligi üpjün edip, olara kodlary bar bolan kodlaşdyryş ulgamlaryna görä uýgunlaşdyrmaga mümkinçilik berýär».

Şu güne çenli platforma tutuş Hytaý boýunça adamşekilli robotlar bilen meşgullanýan 100-den gowrak kärhanany öz içine aldy. Ol 200-den gowrak önüm modeli we 28 müňden gowrak robot üçin anyklaýjy kodlary bermek tapgyryny doly tamamlady.

Indi her bir robotyň öz sanly pasporty bolar. Ýygnalan pursadyndan tä ulanyşdan aýrylýança. Ýurduň kody, kärhananyň kody, önümiň kody we seriýa belgisi. Eýýäm 28 müň robot öz kodyny aldy. Ulgamda 100-den gowrak kärhana bar. Hytaý diňe bir robot öndürmek bilen çäklenmeýär — olaryň hasabyny ýöredýär. Kanunylaşdyrýar, gözegçilik edýär, yzarlaýar. Mesele konweýerden ýene näçe robotyň düşjekdiginde däl. Mesele — beýleki ýurtlaryň haçan şunuň ýaly düzgünleri girizjekdiginde.

Olar entek etikany ara alyp maslahatlaşýan wagty, Hytaý eýýäm “demirleri” kodlaşdyryp başlady. Haýsy robotyň nirededigini bilýär. Ulanyşa başlan gününde tä ulanyşdan aýrylýança. Sebäbi maşynlaryň paýhasly bolýan dünýäsinde gözegçilik — bu gorky däl. Bu zerurlykdyr. Hytaý bolsa muňa eýýäm taýýar.