Putin Pekine saparynyň öňüsyrasynda Hytaýyň raýatlary üçin wideo ýüzlenme bilen çykyş etdi
Russiýa Federasiýasynyň Prezidenti Wladimir Putin HHR-e resmi saparynyň öňüsyrasynda Hytaýyň raýatlary üçin wideo ýüzlenme bilen çykyş etdi.
“Hormatly hytaý dostlarynyz, sizi tüýs ýürekden gutlaýaryn! Men özümiň köp ýyllyk gowy dostum, HHR-niň Başlygy Si Szinpiniň çakylygy boýunça Pekine nobatdaky gezek sapary amala aşyrmaga şatdyryn” diýip, döwlet Baştutany aýtdy.
Adatça, Russiýanyň Prezidenti möhüm daşary ýurt saparlarynyň öňüsyrasynda kabul edýän tarapyň köpçülikleýin habar beriş serişdelerine interwýu berýär ýa-da ýerli metbugatda ikitaraplaýyn gatnaşyklara bagyşlanan makalalary çap edýär. Bu gezek Putin wideo görnüşini saýlady. Öz çykyşynda ol iki ýurduň arasyndaky gatnaşyklaryň görlüp-eşidilmedik derejä ýetendigini nygtady.
“Bu gatnaşyklaryň aýratyn häsiýeti özara düşünişmegiň we ynanyşmagyň ruhunda, deňhukukly we özara bähbitli hyzmatdaşlyga taýýarlykda, hormat goýýan dialogy alyp barmakda, şeýle hem iki ýurduň düýpli bähbitlerine degişli meselelerde, şol sanda döwlet özygtyýarlylygyny we bitewiligini goramakda birek-birege goldaw bermekde ýüze çykýar” diýip, ol aýtdy.
Putin Russiýa bilen Hytaýyň ähli ugurlarda diýen ýaly gatnaşyklary işjeň ösdürýändigini aýtdy. Şeýle hem, iki ýurduň arasynda wizasyz düzgüniň girizilmegi ýurtlaryň raýatlarynyň arasynda gatnaşyklaryň giňelmegine täze mümkinçilikleri açjakdygyny belledi.
Russiýanyň lideri Russiýa bilen Hytaýyň dostlugynyň “kimdir birine garşy däl-de”, “parahatçylyk we umumy abadançylyk ugrunda” gönükdirilendigini aýratyn nygtady.
Russiýanyň Prezidentiniň kömekçisi Ýuriý Uşakow žurnalistlere beren maglumatynda, liderleriň ikitaraplaýyn gatnaşyklaryň iň möhüm we duýgur meselelerini ara alyp maslahatlaşjakdyklaryny aýtdy. Şeýle hem, uglewodorod üpjünçiligi boýunça hyzmatdaşlyk meselesine aýratyn üns berler.
