BAE-de ýurduň taryhynda ilkinji milli gämi gurluşyk konsorsiumy döredildi
Abu Dabi şäherinde dünýäniň öňdebaryjy logistika operatory AD Ports Group BAE-niň Gämi gurluşyk konsorsiumynyň döredilendigini yglan etdi. Bu ýurduň taryhynda gämi gurluşygy, gämi abatlaýşy we deňiz inženerçiligi boýunça döredilen ilkinji bitewi platformadyr. Täze birleşik döwletiň dünýä deňiz pudagyndaky ornuny güýçlendirmegi maksat edinýär.
Başlangyç tapgyrda konsorsiumyň düzümine pudagyň iri milli kompaniýalary, şol sanda AD Ports Group, SAFEEN Drydocks, Dubai Shipbuilding & Engineering we birnäçe metallurgiýa hem-de inženerçilik kärhanalary girdi. Taslamanyň utgaşdyryjysy hökmünde Noatum Maritime halkara kompaniýa çykyş eder.
Birleşik satyn alyş işlerini netijeli utgaşdyrmaga, iş proseslerini amatlaşdyrmaga we pudagyň umumy bäsdeşlige ukyplylygyny ýokarlandyrmaga mümkinçilik berer. Mundan başga-da, bu başlangyç ýerli kiçi we orta telekeçilik kärhanalaryna iri halkara şertnamalara çykalga açar.
“BAE-niň ilkinji gämi gurluşyk konsorsiumynyň döredilmegi ykdysadyýeti diwersifikasiýalaşdyrmak strategiýasynyň çäklerinde ýurduň senagat kuwwatyny ösdürmäge bolan islegimizi görkezýär. Pudagy birleşdirmek arkaly biz BAE-ni dünýä deňiz önümçiliginde öňdebaryjy orunlara çykarýarys” diýip, AD Ports Group kompaniýasynyň baş direktory kapitan Mohamed Juma Al Şamisi aýtdy.
Konsorsium eýýäm daşary bazarlarda işini giňeltmegi meýilleşdirýär. Hususan-da, onuň düzümine girýän SAFEEN Drydocks kompaniýasy golaýda ispan gämi gurluşyk kärhanasy Balenciaga-ny satyn aldy. Bu bolsa hyzmatdaşlara dünýä boýunça çylşyrymly halkara gämi gurluşyk taslamalaryny amala aşyrmaga mümkinçilik berer.
ORIENT
