Rus kinosynyň festiwaly Aşgabatda geçirilýär
27–29-njy mart aralygynda Aşgabatda Russiýa Federasiýasynyň Medeniýet ministrliginiň goldawy bilen ROSKINO tarapyndan gurnalan Rus kinosynyň festiwaly geçirilýär. Filmler “Arkaç” söwda-dynç alyş merkeziniň kinoteatrynda görkezilýär.
Festiwalyň maksatnamasyna rus kinosynyň täze filmleri girizildi. Görkezişler Igor Woloşiniň režissýorlygyndaky maşgala filmi “Buratino” (2025) bilen açylar. Şeýle hem tomaşaçylara Maksim Wolkowyň animasion filmi “Dinozawrlar lukmany” (2025), Aleksandr Babaýew bilen Wasiliý Rowenskiniň fantaziýa žanryndaky “Gnomlaryň hazynalary” (2025), şeýle hem Aleksandr Amirowyň režissýorlygyndaky “Patyşa gyzy-gurbağa” (2025) atly maşgala filmi görkeziler.
Türkmenistanyň paýtagty birnäçe ýyldan bäri häzirki zaman rus kino taslamalarynyň görkezilýän meýdançasyna öwrülýär. ROSKINO-nyň baş direktory Elza Antonowanyň bellemegine görä, şu ýylyň maksatnamasy milli wakalary häzirki zaman çemeleşmeleri bilen utgaşdyrýan maşgala we başdan geçirme hekaýalaryna gönükdirilendir. Onuň aýtmagyna görä, festiwalyň Aşgabatda geçirilmegi ýurtlaryň arasynda medeni dialogyň ösdürilmegine ýardam edýär.
“Gazprom-Media Holding”-iň baş direktory Aleksandr Žarow festiwalda görkezilýän taslamalaryň dürli žanrlary öz içine alýandygyny, ýöne olaryň hemmesiniň tomaşaçylaryň ýüregine ýakyn gelýän ýürekden çykýan duýgulary bilen birleşýändigini aýtdy. Şeýle hem ol “ÝARKO” studiýasy tarapyndan döredilen “Dinozawrlar lukmany” animasion filminiň maksatnama girizilendigini belledi.
Öz gezeginde “Milli Media Topary”-nyň baş direktory Swetlana Balanowa “Buratino” filminiň görkezilmeginiň Russiýa bilen Türkmenistanyň arasyndaky medeni hyzmatdaşlygyň dowam etdirilmeginde möhüm ähmiýete eýedigini nygtady.
Aşgabatda geçirilýän Rus kinosynyň festiwaly ynsanperwer gatnaşyklary pugtalandyrmagyny dowam etdirýär we türkmen tomaşaçylaryny häzirki zaman rus kino sungatynyň täze eserleri bilen tanyşdyrýar.
