Türkmenistanyň bilim ministri Italiýanyň ilçisi bilen duşuşyk geçirdi
26-njy ýanwarda Türkmenistanyň bilim ministri Jumamyrat Gurbangeldiýew Italiýa Respublikasynyň Adatdan daşary we Doly ygtyýarly ilçisi Luiji Ferrari bilen duşuşdy. Bu barada TBM-niň resmi web sahypasynda habar berilýär.
Duşuşygyň dowamynda türkmen tarapy bilimiň ikitaraplaýyn gatnaşyklary pugtalandyrmakda ileri tutulýan ugurlaryň biridigini nygtady. Şeýle hem Türkmenistanyň Prezidentiniň ýolbaşçylygynda milli bilim ulgamynyň yzygiderli kämilleşdirilýändigi, 2052-nji ýyla çenli durmuş-ykdysady ösüş Maksatnamasyna laýyklykda ýurdumyzyň ýokary okuw mekdepleriniň dünýä bilim giňişligine işjeň goşulyşýandygy bellenildi.
Şeýle-de taraplar türkmen-italýan dialogynyň yzygiderli ösdürilýändigini kanagatlanma bilen bellediler. Şunda geçen ýyldaky Halkara parahatçylyk we ynanyşmak ýylyna, Halkara bitaraplyk gününe hem-de Türkmenistanyň hemişelik bitaraplygynyň 30 ýyllygyna bagyşlanan halkara forumyň çäklerinde Italiýanyň Aziýa instituty bilen geçirilen soňky duşuşygyň möhüm ähmiýeti aýratyn nygtaldy.
Bellenilişi ýaly, türkmen tarapy italýan bilim taslamalarynyň çäginde halkara bilim maksatnamalaryna we hünär kämilleşdiriş okuwlaryna gatnaşygyny giňeldýär. Hyzmatdaşlygyň çäklerinde gysga möhletli dil we medeni ugurly okuwlary, mugallymlaryň we talyplaryň tejribe geçişleri, şeýle hem Ýewropa Bileleşiginiň Erasmus+ ýaly taslamalary hem-de sebitleýin başlangyçlary yzygiderli amala aşyrylýar.
Özara pikir alyşmalaryň dowamynda hyzmatdaşlygyň geljekki ugurlary ara alnyp maslahatlaşyldy. Hususan-da, mart-aprel aýlarynda Türkmenistanda geçiriljek matematika boýunça halkara olimpiadalara italýan mekdep okuwçylary we talyplary gatnaşmaga çagyryldy.
Şonuň ýaly-da hereket edýän ikitaraplaýyn ylalaşyklara esaslanýan bilim hyzmatdaşlygynyň ýokary derejesine, türkmen ýokary okuw mekdeplerinde italýan diliniň okadylmagyna, bilelikdäki bilim maksatnamalarynyň durmuşa geçirilmegine we medeni-ynsanperwer çäreleriň guralmagyna aýratyn üns berildi.
ORIENT
