Gurbanguly Berdimuhamedow adyndaky Haýyr-sahawat gaznasy bilen ÝUNISEF hyzmatdaşlygy giňeldýärler
24-nji ýanwarda Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa bilen BMG-niň Çagalar gaznasynyň (ÝUNISEF) Türkmenistandaky wekili Jalpa Ratnanyň arasynda duşuşyk geçirildi. Taraplar çagalaryň saglygyny goramak we durmuş taýdan goraglylygy babatda bilelikdäki taslamalary durmuşa geçirmek boýunça täze ädimleri kesgitlediler.
Söhbetdeşligiň esasy temasy ozal gol çekilen Özara düşünişmek hakynda Ähtnamanyň amaly taýdan durmuşa geçirilmegi boldy. Bu resminama diňe bir resmi häsiýete eýe bolman, eýsem ýokary tehnologiýaly lukmançylyk kömegini bermek, inklýuziw bilim ulgamyny ösdürmek, aýratyn hossarlyga mätäç çagalaryň jemgyýete uýgunlaşmagyny üpjün etmek boýunça halkara gaznanyň mümkinçiliklerini milli başlangyçlar bilen birleşdirmäge şert döredýän hukuk binýadydyr.
Jalpa Ratna Türkmenistanyň Haýyr-sahawat gaznasynyň alyp barýan işleriniň Birleşen Milletler Guramasynyň Durnukly ösüş maksatlarynyň (DÖM) üstünlikli durmuşa geçirilýändiginiň aýdyň mysalydygyny belledi. ÝUNISEF-iň wekili Türkmenistanda çaganyň hukuklaryny we eneligi goramak ulgamynda toplanylan tejribäniň halkara derejesinde giňden ykrar edilmäge mynasypdygyny hem-de beýleki ýurtlar üçin nusga bolup biljekdigini nygtady.
Duşuşyga gatnaşyjylar häzirki wagtda hyzmatdaşlygyň ulgamlaýyn derejä çykandygyny bellediler. Gurbanguly Berdimuhamedow adyndaky Haýyr-sahawat gaznasy döwletiň her bir çaga öňdebaryjy lukmançylyk hyzmatlaryna we ýokary hilli durmuş taýdan goldawa elýeterliligini üpjün edýän esasy gurallarynyň birine öwrüldi.
Duşuşygyň ahyrynda taraplar Türkmenistanyň ýaş raýatlarynyň hemmetaraplaýyn ösmegi üçin iň amatly şertleri döretmäge gönükdirilen täze bilelikdäki maksatnamalary işe girizmäge taýýardygyny tassykladylar.
