Türkmenistan SPECA-nyň parahatçylyk, ynanyşmak we hyzmatdaşlyk meýdançasyna öwrülmegine ýardam berýär
Aşgabat, 20-nji ýanwar | ORIENT. Türkmen paýtagtynda BMG-niň Merkezi Aziýa ýurtlarynyň ykdysadyýetleri üçin Ýörite maksatnamasynyň (SPECA) hepdeligi geçirilýär. Prezident Serdar Berdimuhamedow SPECA-nyň Ykdysady forumyna gatnaşyjylara iberen Gutlagynda Türkmenistanyň Maksatnama başlyklyk ediji hökmünde bu sebiti diňe bir geografik zolak däl-de, eýsem bitewi, innowasion we ýokary tehnologiýaly bazar hökmünde görýändigini aýratyn belledi.
Döwlet Baştutanynyň Gutlagyny seljerip, paýtagtydaky çekişmeleriň esasy temalaryna öwrüljek aşakdaky ileri tutulýan ugurlary tapawutlandyrmak bolar:
Hazar özara baglanyşygy: Türkmenistan «daşarky energetika özara baglanyşygyny » ileri tutulýan ugurlaryň hataryna çykarýar. Bu bolsa Hazar deňzi sebitiniň Ýewraziýanyň bazarlaryny üpjün edýän iň iri energetika merkezine öwrülýändigini aňladýar.
Sanly we «ýaşyl» ösüş: SPECA-nyň gün tertibine elektron söwda we ekologik taýdan arassa tehnologiýalar boýunça taslamalaryň girizilmegi. Aşgabat agza döwletlere umumy innowasiýalar we maýa goýumlar bazaryny döretmegi teklip edýär.
Ulag diplomatiýasy: Türkmenistanyň başlangyjy bilen kabul edilen BMG-niň alty sany kararnamasyna esaslanyp, ýurt dünýä ykdysadyýetiniň üýtgeýän şertlerinde ygtybarly düzümi döretmek boýunça «anyk bilelikdäki ädimlere» geçmegi teklip edýär.
Suw-energetika deňagramlylygy: SPECA-nyň suw we daşky gurşaw boýunça ýöriteleşdirilen toparynyň işine aýratyn üns berler — bu tutuş Merkezi Aziýa üçin örän möhüm meseledir.
Konsepsiýa-2030: Forum geljek onýyllyk üçin Maksatnamany ösdürmegiň uzak möhletleýin strategiýasyna badalga berilýän meýdança öwrülmelidir.
«Ykdysady forum Türkmenistanyň SPECA-nyň parahatçylygyň, ynanyşmagyň we hyzmatdaşlygyň giň meýdançasyna öwrülmegine işjeň ýardam edýändiginiň tassyklanmasy bolar» — diýlip, döwlet Baştutanynyň Gutlagynda bellenilýär.
SPECA-nyň hepdeliginiň çäreleri
Sebit üçin ýylyň esasy wakasy 2030-njy ýyla çenli hyzmatdaşlygyň täze binýadyny kemala getirmek maksady bilen diplomatlary, ykdysatçylary we dünýä derejesindäki bilermenleri birleşdirýär. «Ýyldyz» myhmanhanasynda geçirilýän çäreleriň maksatnamasy sebitiň ykdysadyýetiniň ähli möhüm ugurlaryny öz içine alýar:
20-nji ýanwar, sişenbe güni— bilermenler güni
— Iki sany esasy ugur boýunça işçi toparlarynyň mejlisleri:
Suw we energetika serişdeleri, ekologiýa;
Durnukly ulag, üstaşyr geçelgeler we baglanyşyk.
21-nji ýanwar, çarşenbe güni — Ykdysady forumyň başlanmagy
— SPECA-nyň Ykdysady forumynyň açylyşy we mejlisi. Ýylyň esasy çekişme meýdançasy.
22-nji ýanwar, penşenbe güni — Strategiýa güni
— Forumyň dowamy: 2030-njy ýyla çenli ösüş Konsepsiýasynyň ara alnyp maslahatlaşylmagy.
— Ykdysatçylaryň duşuşygy: BMG-niň we SPECA agza döwletleriň hemişelik utgaşdyryjy wekilhanalarynyň arasyndaky dialog.
23-nji ýanwar, anna — Maýa goýumlar we liderlik
— Liderlik ukyplaryny ösdürmek boýunça 20-nji sessiýa.
— SPECA-nyň Köptaraplaýyn maksatly fondunyň Dolandyryjy komitetiniň 3-nji mejlisi. Bu ýerde geljekki taslamalary maliýeleşdirmek meseleleri çözülýär.
