Kanadanyň Premýer-ministri resmi sapar bilen Pekine geldi

Kanadanyň Premýer-ministri Mark Karni çarşenbe güni resmi sapar bilen Pekine geldi. Hepdäniň şenbe gününe çenli dowam etjek bu sapar, Kanadanyň Premýer-ministriniň soňky sekiz ýylda Hytaýa amala aşyran ilkinji resmi saparydyr.

Hytaýyň Daşary işler ministrliginiň wekili bu resmi saparyň mazmuny barada maglumat bermek bilen, Hytaý Halk Respublikasynyň Başlygy Si Szinpiniň, Kanadanyň premýer-ministri bilen duşuşjakdygyny aýtdy. Duşuşygyň dowamynda Hytaý–Kanada gatnaşyklaryny mundan beýläkde ösdürmek we pugtalandyrmak boýunça täze strategik ugurlar kesgitlener.

Şeýle hem, Hytaýyň Döwlet Geňeşiniň Premýeri Li Sýan we Hytaýyň Halk Wekilleriniň Umumymilli Ýygnagynyň Hemişelik komitetiniň başlygy Çžao Leszi Kanadanyň premýer-ministri bilen aýratynlykda gepleşikleri geçirerler. Gepleşikleriň dowamynda iki taraplaýyn gatnaşyklaryň ýagdaýy, şeýle hem özara bähbitli meseleler boýunça giňişleýin pikir alşylar.

Hytaýyň Daşary işler ministrliginiň wekiliniň bellemegine görä, Hytaý döwleti Kanadanyň premýer-ministriniň bu resmi sapary, özara dialogy we aragatnaşygy pugtalandyrmak, birek-birege syýasy ynamy artdyrmak, hyzmatdaşlygy giňeltmek, bar bolan çaprazlyklary dogry sazlamak hem-de Hytaý – Kanada gatnaşyklarynda gazanylan oňyn ösüş depginini berkitmek üçin möhüm bolan mümkinçilik hasaplaýar. Bu tagallalaryň iki ýurduň halklaryna uly bähbit getirmegine garaşylýar.