Huawei-niň täze flagmany energiýa tygşytlaýjy kamera bilen üpjün ediler
Internet ulgamynda ýakyn wagtda çykaryljak Huawei Pura 90 Ultra flagman smartfony barada täze maglumatlar peýda boldy. Hytaýly insaýderiň maglumatlaryna görä, modeliň esasy täzelenmesi SmartSens SCC80XS sensorly 200 megapikselli teleobýektiwli güýçli kamera bolar. Bu barada GizmoChina neşiri habar berýär.
Bu sensor 22 nanometrli tehnologiki proses boýunça öndürilýär, bu bolsa energiýa tygşytlylygyny ýokarlandyrmaga, ses-şowhuny azaltmaga we dinamiki diapazony giňeltmäge mümkinçilik berýär. Bu täzeligiň masştablaşdyrma wagtynda we pes ýagtylykda surata düşürilende şekiliň hilini ep-esli gowulandyrmagyna garaşylýar.
Maglumatlara görä, esasy kamera sazlap bolýan diafragmaly 50 megapikselli bir dýuýmlik sensora eýe bolar. Bu bolsa meýdan çuňlugyny we düşýän ýagtylygyň mukdaryny has çeýe dolandyrmaga mümkinçilik berer.
Neşir edilen konsept-suratynda kameralaryň korporatiw üçburç bloky saklanyp galýar we häzirki zaman kese ýerleşişde ýerine ýetirilen. Şeýle hem, Pura 90 seriýasynyň tekiz ekranlara dolanyp geljekdigine we 3D ýüz tanamak tehnologiýasyny goldajakdygyna garaşylýar.
Bu hataryň enjamlary Kirin 9030 platformasynda işlär: esasy model Kirin 9030 çibi bilen, Pro we Ultra wersiýalary bolsa has öndürijilikli Kirin 9030 Pro bilen üpjün ediler. Smartfonlar köpugurly işlemegi we ekoulgam bilen integrasiýany maksat edinýän HarmonyOS 6.1 operasion ulgamy bilen çykarylar.
Maglumatlara görä, batareýanyň sygymy esasy wersiýada takmynan 6000 mA·s bolar, uly modellerde bolsa 7000 mA·s çenli ýetip biler. Zarýad beriş goldawy sim arkaly 100 Wt, simsiz bolsa 50 Wt derejesinde garaşylýar.
Huawei Pura 90 seriýasynyň tanyşdyrylyşy maý aýyna meýilleşdirilýär. Hytaýda başlangyç bahasy esasy wersiýa üçin 5 499 ýuan (2026-njy ýylyň 13-nji ýanwaryna görä takmynan 788 ABŞ dollary ýa-da 745 ýewro) bolar.
ORIENT
