Minsk bilen Aşgabat göni howa gatnawyny “täzeden işe girizmäge” hem-de medeni alyş-çalyşlary giňeltmäge taýýarlanýar
Aşgabat, 9-njy ýanwar | ORIENT. Aşgabatda medeniýet, syýahatçylyk we köpçülikleýin habar beriş serişdeleri boýunça wise-premýer Bahar Seýidowanyň Belarus Respublikasynyň Türkmenistandaky Ilçisi Stanislaw Çepurny bilen duşuşygy geçirildi. Belarus Respublikasynyň DIM-niň metbugat gullugynyň resmi habarynda gysga we anyk beýan edilen iki möhüm ugur bellenildi: paýtagtlaryň arasynda göni howa gatnawynyň dikeldilmegi hem-de giň gerimli medeni alyş-çalyşlar.
Taraplar Medeniýet günlerini geçirmäge taýýardyklaryny tassykladylar. Bu görnüşdäki çäreler hemişe iki paýtagtyň medeni durmuşynda aýratyn täsirli waka hökmünde çykyş edýär. Meýilnamalarda diňe döredijilik toparlarynyň çykyşlary däl, eýsem ýöriteleşdirilen sergileriň guralmagy hem göz öňünde tutulýar.
Aşgabat bilen Minskiň arasynda göni howa gatnawynyň täzeden dikeldilmegi baradaky meseläniň ara alnyp maslahatlaşylmagy hem ýurtlarymyzyň arasynda medeni we syýahatçylyk gatnaşyklarynyň ösdürilmegi nukdaýnazaryndan uly ähmiýete eýedir.
