Hytaýda kükürtwodorody arassalamakda ylmy öňegidişlik gazanyldy
Hytaýda kükürtwodorody arassalamak boýunça ylmy öňegidişlik gazanyldy. Bu tehnologiýa himiýa senagatynyň durnukly ösüşini gazanmak üçin täzeçe çözgüdi tapmaga mümkinçilik berýändir.
Hytaýyň Ylymlar akademiýasynyň Dalian Himiýa Fizikasy Institutynyň alymlary tarapyndan işlenip taýýarlanan tehnologiýa hepdäniň sişenbe güni tassyklandy.
Kükürtwodorody tebigy gazyň çykarylyşynda, nebiti gaýtadan işlemekde we kömür-himiýa önümçiliginde emele gelýän zäherli madda bolup, ony doly ýok etmek we peýdaly serişdä öwürmek senagat üçin uzak wagtlap kynçylyk bolup geldi.
20 ýyldan gowrak ylmy-barlag işeleriniň netijesinde alymlar kükürtwodorody fotoliz we elektrohimiki usullar arkaly dargatmak mümkinçiliklerini işläp düzdüler. Bu bolsa uly möçberli önümçilikde ýüze çykýan tehniki päsgelçilikleri aradan aýyrmaga mümkinçilik berdi.
Täze tehnologiýa häzirki wagtda ýylda 100 müň kub metr kükürtwodorodyny peýdaly serişdä öwürmegi maksat edinýän kömür-himiýa görkezme taslamasynda ulanylýar. Maglumatlara görä, kükürtwodorodynyň öwrüliş derejesi 100 göterime ýetýär, netijede ýokary hilli kükürt we arassa wodorod öndürilýär.
Hytaý Ylymlar akademiýasynyň akademigi, Dalian Himiýa Fizikasy Institutynyň alymy Li San bu tehnologiýanyň daşky gurşawy goramak bilen bir hatarda arzan we howpsuz şertlerde uly möçberde wodorod öndürmäge mümkinçilik berýändigini, onuň ýangyç elementlerinde we howa-älem ugurlarynda hem ulanylyp bilinjekdigini aýtdy.
