Hytaý 2026-njy ýylda awtoulaglaryň we hojalyk tehnikalarynyň söwdasyny ösdürmek boýunça milli maksatnamasyny giňeldýär
Hytaý 2026-njy ýylda awtoulaglaryň we hojalyk tehnikalarynyň söwdasyny ösdürmek boýunça umumymilli düzgünleri kabul etdi. Bu çäreler içerki sarp edijiligi höweslendirmeklige hem-de ilatyň ýaşaýyş-durmuş şertlerini gowulandyrmaklyga gönükdirilendir.
Hytaýyň Söwda ministrligi we degişli edaralary awtoulaglaryň alyş-çalyş söwdalaryny ösdürmek boýunça döwlet tarapyndan goldaw bermekligiň düzgünlerini çap etdiler. 2025-nji ýyl bilen deňeşdirilende, täze düzgünler boýunça, döwlet tarapyndan goldaw almaklygyň talaplaryna laýyk gelýän awtoulaglaryň hasaba alnyş möhleti uzaldylýar. Şol bir wagtyň özünde, köne awtoulaglary ulanyşdan aýyrmak we onuň ýerine täzesini satyn almak boýunça goldaw dowam etdiriler. Döwlet tarapyndan berilýän täze goldawlar ýurduň ähli ýerinde satyn alynjak täze awtoulagyň satuw bahasynyň belli bir göterimini tölemek görnüşinde berler.
Täze syýasat awtoulag bazarlarynda işjeňligi eýýäm ýokarlandyrdy. Hytaýyň Žeszian welaýatynyň Szinhuaý şäherinde döwlet goldawy boýunça alyş-çalyş söwdalarynyň möçberi artdy. Ýerli ýaşaýjylaryň biri, bu maksatnama 10 müňden 20 müň ýuana (ýagny1 430 – 2 860 ABŞ dollaryna) çenli tygşytlamaga mümkinçilik berendigini aýtdy.
Pudak wekilleriniň bellemegine görä, 2026-njy ýyldaky esasy täzelik döwlet goldawynyň möçberiniň belli bir möçberden göterim görnüşine geçirilmegidir. “Awtoulag näçe gymmat bolsa, goldaw möçberi hem şonça ýokary bolar” diýip, Ýunnan welaýatyndaky awtoulag satuw kompaniýasynyň satuw direktory Çen Şaokun aýtdy.
Alyş-çalyş maksatnamasy hojalyk tehnikalaryny hem öz içine alýar. Hytaýyň Szýansi welaýatynyň Ganzhou şäherinde sowadyjylar, kir ýuwujy enjamlar we telewizorlar boýunça berilýän döwlet kömeginiň möçberi satuwlaryň ep-esli artmagyna sebäp boldy. Bir alyjy täze tehnikalara geçmek arkaly 3 müň ýuandan gowrak tygşytlandygyny aýtdy.
Söwda nokatlarynyň maglumatlaryna görä, şu ýylyň 1-nji ýanwaryndan döwlet goldaw çäreleriniň täzeden başlamagy bilen käbir dükanlaryň gündelik dolanyşygy 100 müňden 200 müň ýuana çenli ýokarlandy.
