Si Szinpin we Koreýa Respublikasynyň Prezidenti strategik hyzmatdaşlygy ösdürmäge ygrarlydyklaryny tassykladylar
Hytaý Halk Respublikasynyň Başlygy Si Szinpin hepdäniň duşenbe güni Pekinde Koreýa Respublikasynyň Prezidenti Li Çže Men bilen gepleşikleri geçirdi.
Si Szinpin iki ýurduň ýolbaşçylarynyň iki gezek duşuşyk geçirendiklerini hem-de özara döwlet saparlaryny amala aşyrandyklaryny belläp, bu duşuşyklaryň Hytaý Halk Respublikasynyň we Koreýa Respublikasynyň arasyndaky gatnaşyklara berilýän uly ähmiýeti görkezýändigini aýtdy. “Goňşy we dost ýurtlar hökmünde Hytaý Halk Respublikasy bilen Koreýa Respublikasynyň aragatnaşyklary giňeldilmelidir hem-de hyzmatdaşlyklar yzygiderli dowam etdirilmelidir” diýip, Si Szinpin belledi.
Hytaý döwleti Koreýa Respublikasy bilen özara gatnaşyklaryny sebit diplomatiýasynyň ileri tutulýan ugurlarynyň biri hökmünde hasaplaýandyr we dostlukly hyzmatdaşlygyň, özara bähbitli ýörelgäniň saklanmagyna ygrarlydyr. Si Szinpin Hytaý döwletiniň, Koreýa Respublikasy bilen bilelikde, strategik hyzmatdaşlygy ösdürmäge, iki halkyň abadançylygyny pugtalandyrmaga hem-de sebit we dünýä parahatçylygyna goşant goşmaga taýýardygyny aýtdy.
Si Szinpin Hytaýyň 15-nji bäşýyllyk maksatnamasynyň dünýä ýurtlary üçin giň ösüş mümkinçiliklerini açýandygyny belledi. Iki ýurduň önümçilik we üpjünçilik zynjyrlarynyň çuňňur arabaglanyşyklydygyny belläp geçmek bilen, ösüş strategiýalarynyň sazlaşdyrylmagynyň, emeli intellekt, ekologiýa taýdan arassa önümçilikler we “kümüş ykdysadyýet” ýaly täze ugurlarda hyzmatdaşlygyň giňeldilmeginiň möhümdigini aýtdy. Şeýle hem ol iki halkyň arasyndaky gatnaşyklary ösdürmegiň zerurdygyny nygtady.
“Dünýäde bolup geçýän düýpli özgertmeleriň döwründe, Hytaý Halk Respublikasy bilen Koreýa Respublikasy, sebitde parahatçylygy üpjün etmek we dünýä ösüşine goşant goşmak boýunça öz jogapkärçiliklerini bilýärler” diýip, Si Szinpin aýtdy. Ol Ikinji jahan urşunda gazanylan ýeňşiň netijelerini goramagyň, proteksionizme garşy durmagyň, hakyky köptaraplaýynlygy öňe sürmegiň hem-de deňhukukly köptaraplaýyn dünýä tertibini, hemmelere bähbitli bolan açyk ykdysady hyzmatdaşlygy goldamagyň möhümdigini belledi.
Prezident Li Çže Men, Koreýa Respublikasy bilen Hytaý Halk Respublikasynyň köp ýyllaryň dowamynda özara hyzmatdaşlygyny ösdürip gelýän goňşy ýurtlardygyny aýtmak bilen, Koreýa Respublikasynyň Hytaý döwleti bilen gatnaşyklaryna ýokary ähmiýet berýändigini belledi. Ol Koreýa Respublikasynyň “bir Hytaý” ýörelgesine ygrarlydygyny hem-de Hytaýyň esasy bähbitlerine hormat goýýandygyny tassyklady.
Li Çže Men Koreýa Respublikasynyň Hytaý Halk Respublikasy bilen strategik hyzmatdaşlygy çuňlaşdyrmaga, Hytaýyň 15-nji bäşýyllyk maksatnamasynyň mümkinçiliklerinden peýdalanmaga, ykdysady hyzmatdaşlygyň amaly netijelerini giňeltmäge, halklaryň arasyndaky gatnaşyklary has-da berkitmäge hem-de ählumumy abadançylygyň üpjün edilmegi üçin Hytaý döwleti bilen köptaraplaýyn hyzmatdaşlygy pugtalandyrmaga taýýardygyny aýtdy.
