Täze ýylyň öňüsyrasynda Daşoguz welaýatynyň ýaşaýjysy 110 ýaşyny belledi
Täze ýylyň öň ýanynda Akdepe etrabynyň Daýhan obasynyň ýaşaýjysy Nowar Gylyjowa seýrek duş gelýän ýubileýi — 110 ýaşyny — belledi. Uzak ömürli zenan doglan gününi çagalarynyň, agtyklarynyň, çowluklarynyň hem-de obadaşlarynyň arasynda, mähirli maşgala gurşawynda garşylady. «Türkmenistan» gazetiniň habar bermegine görä, dogduk obasynda ol uly we agzybir maşgalanyň daýanjy hasaplanýar.
Nowar enäniň arkasynda baý durmuş ýoly we berk maşgala bar: onuň üç ogly, iki gyzy, 16 agtygy we alty çowlugy bar, ýakyn wagtda bolsa maşgalada ýene-de täze perzende garaşylýar. Ýubileý ýaşyny belleýän enäniň çagalarynyň we agtyklarynyň köpüsi mugallymçylyk hünärini saýladylar, şonuň üçin obada bu maşgalany «mugallymlar maşgalasy» diýip atlandyrýarlar. Nowar enäniň ogullarynyň biri — Tirkeş — 39-njy orta mekdepde eýýäm ýarym asyrdan gowrak zähmet dersinden mugallym bolup işleýär.
«Öz zähmetimiň netijelerini görmäge we bolelin durmuşda ýaşamaga maňa miýesser etdi, — diýip uzak ömürli zenan belleýär. — Ähli çagalarym berk maşgalalar gurdy, agtyklarymyň köpüsi bolsa eýýäm özbaşdak durmuş ýoluna gadam basdy».
Nowar Gylyjowa ömrüni tutuşlygyna oba hojalygyna bagyşlady. Ol öz uzak ömrüniň syryny ýagşy niýetler, halal zähmet we çagalary baradaky alada bilen baglanyşdyrýar. Baýramçylyk günlerinde uly maşgala däp bolşy ýaly bilelikde jemlenip, uzak aralyga garamazdan, mylaýym garyndaşlyk gatnaşyklaryny saklaýar.
Täze ýyl mynasybetli watandaşlaryny gutlap, 110 ýaşly Türkmenistanyň ýaşaýjysy hemmelere berk jan saglyk, uzak ömür we abadançylyk arzuw etdi.
ORIENT
