Hytaýda iň beýik dag gidroelektrik stansiýasy işe girizildi
Hytaýda gurulýan, giperbolik arkaly bent taslamalarynyň arasynda iň beýik daglyk sebitde ýerleşýän we 14-nji bäşýyllyk meýilnamanyň (2021–2025 ýý.) çäklerinde möhüm taslama hasaplanýan Ýebatan gidroelektrik stansiýasy resmi taýdan elektrik energiýasyny öndürip başlady: şenbe güni ilkinji iki energiýa blogy işe girizildi.
Bu waka Hytaýyň iň uzyn derýasy bolan Ýanszy derýasynyň ýokarky akymy — Szinşa derýasynyň ýokarky böleginde döredilýän bitewi «suw–gün–ýel» energiýa bazasynyň ösüşinde möhüm öňegidişligi alamatlandyrýar.
Deňiz derejesinden 2894 metr beýiklikde, Szinşa derýasynyň ugrunda ýerleşýän Ýebatan GES-i Hytaýyň günorta-günbatar bölegindäki Syçuan welaýatynyň Baýýuý etrabynyň hem-de goňşy Siszan Awtonom Sebitiniň Gunszýue etrabynyň çäginde ýerleşýär.
Jemi gurlan kuwwaty 2,24 gigawatt bolan bu stansiýa Szinşa derýasynyň ýokarky akymynda işe girizilen iň uly gidroelektrik stansiýasydyr.
Gurluşyk döwründe taslama deňiz derejesinden uly beýiklik, aşa sowuk howa şertleri, beýik arkaly bent, ýer gatlaklarynda ýokary dartgynlylyk, uly çuňluk we uly aralyga eýe ýerasty elektrik stansiýasy ýaly köp sanly inženerçilik kynçylyklaryna duçar boldy.
Takmynan on ýyla golaý dowam eden gurluşykdan soň, stansiýa ilkinji kilowat-sagat ekologiýa taýdan arassa elektrik energiýasyny üstünlikli öndürdi.
Gurluşyk döwründe möhüm tehniki öňegidişlikleriň biri hökmünde beýik dag şertlerine uýgunlaşdyrylan gyşky beton guýma usullarynyň işlenip düzülmegi görkezilýär. Pudakda ilkinji gezek inženerler beýik daglyk sebitde ýerleşýän arkaly bent üçin beton guýma işlerini ýylyň dowamynda üznüksiz alyp barmagy başardylar.
Mundan başga-da, olar uzynlygy 38,1 metre deň bolan beton ýadrosynyň nusgasyny çykardylar. Ol bolsa gurluşyk taslamalarynda hasaba alnan iň uzyn beton ýadrosy bolup, beýik daglyk sebitlerde geljekde gidroenergetikanyň ösdürilmegi üçin gymmatly tehniki tejribe berdi.
«Stansiýa doly kuwwatynda işe girizilenden soň, öndürýän ekologiýa taýdan arassa elektrik energiýasyny Szinşa derýasynyň ýokarky akymyndan Hytaýyň merkezi bölegindäki Hubeý welaýatyna çenli ±800 kV hemişelik tokly elektrik geçiriji liniýa arkaly iberip biler» - diýip, döwlet eýeçiligindäki China Huadian korporasiýasynyň Ýebatan GES taslamasynyň baş inženeri Sýa Ýun belledi.
