Google sesli gözlegi resmi taýdan Gemini emeli aňy bilen çalyşýar
Adaty sesli kömekçiniň döwri tamamlanyp barýar, sebäbi Google kompaniýasy 2026-njy ýylyň mart aýynda «Google Assistant» hyzmatynyň ýapyljakdygyny resmi taýdan tassyklady. Köne hyzmatyň ornuna emeli aň esasynda işleýän ösen çat-bot — Gemini giriziler. Bu çözgüt Android ulgamyny ulanýan ähli ulanyjylara täsir eder, ýöne geçiş ähli adamlar üçin birmeňzeş we oňyn bolmaz.
Android 10 we ondan ýokary operasion ulgamy bolan häzirki zaman smartfonlarynyň eýeleri üçin bu çalyşma awtomatiki ýagdaýda amala aşyrylar. Enjamyň iň azyndan 2 GB operatiw ýady (RAM) bar bolsa, ulgam dolandyryş funksiýalaryny öz-özünden Gemini-e geçirer. Emma köne model telefonlaryň eýeleri kyn ýagdaýa düşer: olaryň enjamlary täze emeli aňy goldamaýar, köne Assistent bolsa soraglara jogap bermegini bes eder. Mundan başga-da, bu programma Google Play dükanyndan doly aýrylar.
Täze tehnologiýa geçiş söwda taýdan hem üýtgeşmeleri getirýär. 10 ýyl dowam eden işiniň dowamynda mahabatdan azat bolan nusgawy kömekçiden tapawutlylykda, Gemini ulgamyna mahabat ýerleşdirilmegi meýilleşdirilýär. Şeýle hem sebit taýdan elýeterlilik möhüm mesele bolup galýar. Käbir ýurtlarda, şol sanda Russiýada, Gemini resmi taýdan işlemeýär. Eger Google 2026-njy ýylyň mart aýyna çenli elýeterlilik syýasatyny üýtgetmese, bu ýagdaý ulanyjylary adaty sesli dolandyryşdan mahrum edip biler.
Ilkibaşda Google bu prosesi bir ýyl öň tamamlamagy meýilleşdiripdi, ýöne emeli aňyň jogaplarynyň hilini kämilleşdirmek maksady bilen möhletler yza süýşürildi. Kompaniýa kömekçini çylşyrymly meseleleri çözmäge ukyply doly derejeli sanly gürrüňdeşe öwürmegi maksat edinýär. Şeýle-de bolsa, köp ulanyjylar üçin bu ädim ýönekeý we ygtybarly guraldan ýüz öwrüp, mahabatly we has çylşyrymly ulgama geçmäge mejbury ädim bolar.
ORIENT
