Türkmenistan - Ýaponiýa: kämil hünärmenleri taýýarlamakda ýokary bilim hyzmatdaşlygy
Ýakynda Türkmenistanyň Prezidentiniň Ýaponiýa amala aşyran iş saparynyň çäklerinde döwlet ähmiýetli birnäçe Ähtnamalara gol çekildi. Şolaryň hatarynda Oguz han adyndaky Inžener-tehnologiýalar uniwersiteti bilen Ýaponiýanyň Tohoku uniwersitetiniň Inženerçilik mekdebiniň arasynda özara düşünişmek hakynda Ähtnama, hem-de şol uniwersitet bilen talyp alyş-çalşygy boýunça özara düşünişmek hakynda Ähtnama, şeýle-de Ýaponiýanyň Hirosaki uniwersitetiniň Ylym we tehnologiýalar boýunça ýokary mekdebiniň arasynda özara düşünişmek hakynda Ähtnama gol çekildi. Bu barada Türkmenistanyň Bilim ministrligi habar berýär.
Ähtnamalaryň maksady ylym we bilim hyzmatdaşlygyny ösdürmekden, bilelikdäki maksatnamany döretmekden we özara gyzyklanma bildirilýän ýokary bilim ulgamynda hyzmatdaşlyk etmekden, kämil hünärmenleri taýýarlamak ugrunda giň gerimli işleri alyp barmakdan ybaratdyr. Bu Ähtnamalar Türkmenistan bilen Ýaponiýa döwletiniň ylym-bilim ulgamyndaky gatnaşyklaryny ösdürmekde we pugtalandyrmakda möhüm ädim boldy.
Türkmenistanyň Oguz han adyndaky Inžener-tehnologiýalar uniwersiteti häzirki wagta çenli Ýaponiýa döwletiniň bilim edaralary hem-de kompaniýalarynyň jemi 10-sy bilen Ähtnamalara gol çekişdi.
ORIENT
