Dubaýda yssy howada gezelençler üçin niýetlenen 93 kilometrlik ýapyk ýol — THE LOOP taslamasy hödürlendi
URB binagärlik studiýasy Dubaý şäherini doly gurşap aljak, uzynlygy 93 kilometre barabar bolan giň möçberli ýapyk ýol — THE LOOP taslamasyny hödürledi. Bu innowasion welosiped-pyýada ýoly Dubaýyň esasy meseleleriniň biri bolan aşa yssy howa şertlerini çözmegi maksat edinýär, sebäbi bu ýagdaýda gündiz gezelençler asla mümkin däl.
Taslamanyň esasy maksady — 2040-njy ýyla çenli Dubaýyň ýaşaýjylarynyň 80%-iniň işe pyýada ýa-da welosiped bilen baryp bilmegini üpjün etmekdir. THE LOOP klimat gözegçilik ulgamy bilen üpjün edilen uly aýna tunelden ybaratdyr. Onuň içinde seýilgähler, sport meýdançalary, skeýt-parklar we dynç alyş zolaklary bolan amatly gurşaw dörediler. Şeýlelikde işe barýan ýol salkyn halka görnüşindäki seýilgähde gezelenje öwrüler.
Taslamanyň döredijileri yşyklandyryş üçin 100% gaýtadan dikeldilýän energiýany, ösümlikleri suwarmak üçin bolsa gaýtadan arassalanan suwy ulanmagy meýilleşdirýärler. Bu taslama diňe bir sagdyn durmuş ýörelgesini ösdürmek bilen çäklenmän, şäheriň awtoulaglara bolan garaşlylygyny hem düýpgöter azaldar. Syýahatçylar üçin bolsa THE LOOP dünýä derejesindäki täze gözel ýer bolup, şäheri günüň islendik wagtynda yssydan gorkmazdan gezmäge mümkinçilik berer.
Häzirki wagtda THE LOOP taslamasy ylalaşyk tapgyryndadyr we «Dubaý 2040» ösüş meýilnamasyna girizilendir. Gurluşyk möhletleri we býujeti heniz tassyklanmadyk hem bolsa, taslama eýýäm häzirki zaman megalopolisleriniň keşbini üýtgetjek geljegiň iň batyrgaý binagärlik çözgütleriniň biri hökmünde atlandyrylýar.
Bu taslama yssy howa şertlerinde amatly hereket etmegiň meselesini çözýär. Häzirki wagtda Dubaýyň ýaşaýjylary esasan taksiden peýdalanmaga ýa-da söwda merkezlerinde bolmaga mejbur bolsa, THE LOOP-nyň peýda bolmagy gözegçilik edilýän gurşawda howpsuz sport bilen meşgullanmaga we açyk howada gezelenç etmäge mümkinçilik berer.
ORIENT
