Ýapon – türkmen parlamentara dostluk topary – täze ykdysady taslamalaryň hukuk köprüsi
TOKIO, 19-njy dekabr | ORIENT. Prezident Serdar Berdimuhamedow iş saparynyň dowamynda Tokioda Ýapon-türkmen parlamentara dostluk toparynyň başlygy Endo Toşiaki bilen duşuşdy. Bu duşuşyk iki ýurduň arasyndaky strategik hyzmatdaşlygyň “hukuk binýadyny” döretmekde kanun çykaryjylaryň aýratyn ornuny nygtady. Taraplar häzirki wagtda parlament hyzmatdaşlygynyň uzak möhletleýin maýa goýum başlangyçlaryny durmuşa geçirmek üçin ygtybarly şert bolup hyzmat edýändigini tassykladylar.
Endo Toşiaki Aşgabat bilen Tokiony ýakynlaşdyrmaga bahasyna ýetip bolmajak goşan goşandy üçin türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa çuňňur minnetdarlygy bildirdi.
Söhbetdeşligiň dowamynda Türkmenistanyň Halk Maslahatynyň Başlygynyň Aşgabatda “Merkezi Aziýa + Ýaponiýa” parlamentara forumyny geçirmek barada öňe süren başlangyjynyň ähmiýetine üns çekildi. Bu meýdança parahatçylygyň we özara düşünişmegiň güýçli guralyna öwrülmäge gönükdirilendir.
Bellenilişi ýaly, kanunçylyk goldawy we dostluk toparlary ýapon kompaniýalarynyň türkmen bazaryndaky işine gönüden-göni ýardam edip, şertnamalaryň aýdyňlygyny hem-de uzak möhletleýindigini üpjün edýär.
Endo Toşiaki şeýle hem “EKSPO — 2025”-de Türkmenistanyň milli pawilýonynyň üstünligine haýran galýandygyny mälin etdi we onuň ýurduň “wizitka kartyna” öwrülendigini, ýapon jemgyýetçiliginde we halkara bilermenlerinde uly gyzyklanma döredendigini nygtady.
