Si Szinpin Halkara parahatçylyk we ynanyşmak ýylyna bagyşlanan foruma gatnaşyjylara gutlagyny iberdi
Ählumumy dialog üçin dünýä meýdançasyna öwrülen Aşgabat, ýene-de bir gezek parahatçylyk döredijilikli we strategik hyzmatdaşlygyň merkezi hökmündäki ornuny tassyklady.
Hytaý Halk Respublikasynyň Başlygy Si Szinpin anna güni Türkmenistanyň paýtagtynda geçirilen, Halkara parahatçylyk we ynanyşmak ýylyna bagyşlanan foruma gatnaşyjylara gutlag hatyny iberdi. Gutlag haty Hytaý Halk Respublikasynyň hökümetiniň «Sinhua» resmi habarlar gullugy tarapyndan çap edildi.
Si Szinpiniň gutlagynda belläp geçmegine görä, 2025-nji ýyl Türkmenistanyň başlangyjy bilen, BMG-niň Baş Assambleýasy tarapyndan tassyklanan Halkara parahatçylyk we ynanyşmak ýyly hökmünde bellenilýär. Şeýle hem, şu ýylda Türkmenistanyň hemişelik Bitaraplyk derejesine eýe bolmagynyň 30 ýyllygy hem bellenilýär diýip, Hytaý Halk Respublikasynyň Başlygy nygtady.
Hytaý bilen Türkmenistan özara bähbitli hyzmatdaşlyga ygrarly, umumy garaýşa eýe bolan gowy dostlar we ygtybarly hyzmatdaşlar bolup durýar diýip, Si Szinpin çykyşyny dowam etdirdi. Ol Hytaýyň Türkmenistanyň hemişelik Bitaraplyk syýasatyny berk goldaýandygyny, şeýle hem onuň ählumumy we sebit parahatçylygyny, durnuklylygyny üpjün etmekde hem-de ähli ýurtlaryň umumy ösüşine ýardam bermekde edýän işlerine ýokary baha berýändigini belledi.
Si Szinpin häzirki wagtda ählumumy kynçylyklaryň artýandygyny, dawalaryň we gapma-garşylyklaryň dowamly ýüze çykýandygyny, şonuň üçin hem dünýäniň öňküsinden has-da parahatçylyga we ynanyşmaga mätäçdigini nygtady.
Hytaý Halk Respublikasynyň Başlygynyň sözlerine görä, taryh halkara ýagdaýyň näçe durnuksyz we bulaşyk boldugyça, halkara jemgyýetçiliginiň şonça-da has berk birleşmäge we biri-birini goldamaga mätäçdigini görkezýär.
Ol özara hormaty, özara ynanyşmagy we düşünişmegi goldamagyň, parahatçylyk ýetmezçiligini aradan aýyrmagyň, BMG-niň abraýyny we derejesini berk saklamagyň, jedelleri parahatçylykly ýol bilen çözmegiň, gegemoniýa, basyşlara we şahsy bähbitler üçin beýlekilere zyýan ýetirmäge garşy durmagyň zerurdygyny belledi.
Si Szinpin ynanyşmak ýetmezçiligini aradan aýyrmak üçin bilelikdäki maslahatlaşma, bilelikdäki goşant we umumy bähbitler ýörelgesine eýermegi, halkara hukugynyň hökmürowanlygy arkaly adalatlylygy we päkligi üpjün etmegi, köpugurlylyk arkaly jebisligi we hyzmatdaşlygy ösdürmegi, ählumumy meseleleri bilelikde ara alyp maslahatlaşmak, halkara tertibini bilelikde goramak we dolandyryşyň netijelerini bilelikde peýdalanmak ýörelgelerine eýermäge çagyrdy.
Hytaý Halk Respublikasynyň Başlygy özüniň ýakynda öňe süren Ählumumy dolandyryş başlangyjynyň ählumumy dolandyryş ulgamyny özgertmek we kämilleşdirmek üçin hytaý çözgüdini hödürleýändigini belledi. Şeýle hem ol Hytaýyň ähli ýurtlar bilen bilelikde dünýäde parahatçylygy goramaga, umumy ösüşe ýardam bermäge we adamzadyň bitewi ykbal jemgyýetini gurmaga taýýardygyny beýan etdi.
