Sanly köpri: «Elkart» we Alipay+ serhetara QR-tölegleri üstünlikli synagdan geçirdi
«Elkart» milli töleg ulgamynyň operatory bolan «Bankara Prosesing Merkezi» (MPC) hem-de halkara Alipay+ platformasy Alipay+/ELQR integrasiýasynyň çäklerinde ilkinji synag amalyny üstünlikli ýerine ýetirdiler. Bu waka Gyrgyzstan bilen Alipay+ ulgamynyň bar ýerindäki ýurtlaryň arasynda sanly köpriniň döredilmeginiň başlangyjy bolup, serhetara tölegleriň mümkinçiliklerini has-da giňeldýär.
Synag Hytaýyň Şanhaý şäherinde, «MPC»-niň başlygy Altymyş Turatbekowyň iş saparynyň dowamynda geçirildi. Hünärmenler Alipay ugruna QR-kod arkaly tölegiň synag amalyny barlap gördüler, we ol üstünlikli tamamlandy. Bu bolsa Gyrgyz Respublikasynyň Milli bankynyň sanly hyzmatlary we halkara hyzmatdaşlygy ösdürmek boýunça goýýan wezipeleriniň ýerine ýetirilişiniň yzygiderli ilerleýändigini tassyklaýar.
Hyzmatdaşlygyñ täze tapgyry gyrgyz raýatlary hem-de daşary ýurtly myhmanlar üçin goşmaça mümkinçilikleri açýar.
Birinji tapgyrda «Elkart» ulanyjylary daşary ýurtlardaky millionlarça söwda nokatlarynda Alipay+ tarapyndan QR-kod arkaly harytlary we hyzmatlary tiz we amatly tölemäge mümkinçilik alarlar.
Ikinji tapgyrda tölegler ikitaraplaýyn häsiýete eýe bolar we bu ulgamlaryň arasynda özara QR-tölegleriň kabul edilmegini üpjün eder.
«MPC» bilen Alipay+ (57 ýurtda işleýän Ant International kompaniýasynyň sanly töleg platformasy) arasynda özara düşünişmek baradaky Ähtnama sentýabr aýynda Şanhaýda gol çekildi.
ORIENT
