Kyodo News: “Ýaponiýa – Merkezi Aziýa” sammiti 20-nji dekabrda geçiriler
Ýaponiýa bilen Merkezi Aziýa ýurtlarynyň arasyndaky halkara dialog anyk görnüşlere eýe bolýar. “Kyodo News”-yň habaryna görä, döwlet Baştutanlarynyň gatnaşmagynda geçiriljek “Ýaponiýa – Merkezi Aziýa” sammiti 20-nji dekabrda Tokioda geçiriler.
Bu maglumat 2-nji dekabrda Ýaponiýanyň Liberal-demokratik partiýasynyň (LDP) wise-prezidenti Taro Asonyň başlyklyk etmeginde geçirilen Ýaponiýa – Merkezi Aziýa dostluk ligasynyň umumy ýygnagynda beýan edildi.
Taro Aso, Premýer-ministr Sanae Takaitiniň Merkezi Aziýanyň bäş ýurdy bilen sammite taýýarlyklary işjeň utgaşdyrýandygyny aýtdy. Ol “Merkezi Aziýa halkara ünsüniň yzygiderli artýandygyny we sammitiň üstünliginiň diplomatik nukdaýnazardan diýseň möhümdigini” nygtady.
Şeýle hem Premýer-ministr Sanae Takaitiniň sammite gatnaşjak her bir döwlet ýolbaşçysy bilen aýratyn duşuşyklary meýilleşdirilýär. Duşuşykda “döwlet Baştutanlaryny mähirli garşylamak we sebit bilen gatnaşyklary çuňlaşdyrmagy goldamak” syýasaty tassyklandy.
Şeýle ýokary derejede üns berilmegi, amatly strategik ýerleşişe we baý serişde binýadyna eýe bolan Merkezi Aziýanyň strategik ähmiýeti bilen düşündirilýär.
