Ilçi Baýramow BAE-niň Prezidentine ynanç hatlaryny gowşurdy
Türkmenistanyň Birleşen Arap Emirliklerindäki Ilçisi Baýram Baýramow Birleşen Arap Emirlikleriniň Prezidenti Şeýh Muhammed bin Zaýed Al Nahaýýana ynanç hatlaryny gowşurdy. 2025-nji ýylyň 27-nji noýabrynda dabaranyň birinji bölegi hormat garawulyň öňünde döwlet senalarynyň ýerine ýetirilmegi bilen geçirildi.
1-nji dekabrda Abu-Dabide ýerleşýän Kasr al Watan köşgünde geçirilen dabara BAE-niň Wise-prezidenti we Premýer-ministriň orunbasary, Prezidentiň Diwanynyň başlygy Şeýh Mansur bin Zaýed Al Nahaýyan, şeýle hem Premýer-ministriň orunbasary we Daşary işler ministri Şeýh Abdulla bin Zaýed Al Nahaýýan gatnaşdy.
Ilçi B.Baýramow BAE-niň Prezidentine Türkmenistanyň Prezidenti Serdar Berdimuhamedowyň hem türkmen halkynyň Milli Lideri Gurbanguly Berdimuhamedowyň mähirli salamlaryny we iň gowy arzuwlaryny ýetirdi.
Birleşen Arap Emirlikleriniň Prezidenti türkmen diplomatyny jogapkärli wezipä bellenilmegi bilen gutlap, ikitaraplaýyn hyzmatdaşlygy mundan beýläk-de pugtalandyrmakda üstünlikleri arzuw etdi.
Gepleşikleriň esasy pursady Halkara parahatçylyk we ynanyşmak ýylyna şeýle hem Türkmenistanyň hemişelik Bitaraplygynyň 30 ýyllygyna bagyşlanyp geçiriljek Halkara forumyna BAE-niň wekiliýetiniň gatnaşmagyny ara alnyp maslahatlaşmak boldy. Ilçi B.Baýramow BAE-niň Prezidentine Türkmenistana sapar bilen gelmek baradaky resmi çakylygy gowşurdy. Munuň özi bolsa ýokary derejede ikitaraplaýyn gatnaşyklaryň ösdürilmeginde möhüm ädim boldy.
Duşuşygyň ahyrynda Türkmenistanyň Adatdan daşary we Doly ygtyýarly Ilçisi türkmen-emirlikler gatnaşyklarynyň ösdürilmegine yzygiderli goldaw berýändigi üçin BAE-niň Prezidentine hoşallyk bildirip, netijeli döwletara gatnaşyklary mundan beýläk-de ösdürmäge, iki ýurduň halklarynyň arasyndaky dost-doganlyk gatnaşyklarynyň berkidilmegi üçin ähli tagallalary etjekdigine ynandyrdy.
