Eýran ilkinji ýük otlusyny Türkmenistanyň üsti bilen Özbegistana iberdi
Eýran, Türkmenistan we Özbegistan sebitleýin logistika ulgamynyň ösdürilmeginde möhüm wakany belleýärler: ilkinji gezek Eýranyň özünde öndürilen wagonlardan ybarat ýük otlusy rugsatnamany alyp, Merkezi Aziýa göni gatnawy amala aşyrdy.
Demir ýol diplomatiýasy we sebitleýin ylalaşyklar çäginde amala aşyrylan bu ädim söwdany ösdürmek üçin täze mümkinçilik döredýär hem-de Eýranyň Gündogar–Günbatar geçelgesindäki ornuny pugtalandyrýar.
Eýranyň Yslam Respublikasynyň Demir Yollarynyň Daşarky söwda boýunça Baş direktory Şahriar Nagizadeniň habar berşi ýaly, 2025-nji ýylyň 1-nji dekabrynda duşenbe güni Sarahs (Eýran/Türkmenistan) serhet geçelgesinden ilkinji otly Buhara (Özbegistan) şäherine ugrady.
Eýranda öndürilen 40 wagondan ybarat bu otly gara metallurgiýa önümlerini, şol sanda öýjükli demiri daşap, Türkmenistanyň territoriýasy arkaly bellenilen nokada ýetýär.
Bu gatnaw ugry aýratyn ähmiýetli boldy, sebäbi eýran demir ýol düzümlerine ozal ýurdara GDA döwletleriniň üsti bilen gönüden-göni geçmäge rugsat berilmeýärdi; ýükler diňe daşary ýurt wagonlarynda daşalyp bilnerdi. Eýran wagonlarynyň bu ugurda gönüden-göni hereket etmegi düýpli gepleşikler netijesinde mümkin boldy diýip, Eýranyň ulag boýunça ýöriteleşdirilen neşiri Tinn News habar berýär.
Bu üstünlik Eýran, Hytaý, Özbegistan, Türkiýe, Türkmenistan we Gazagystan tarapyndan gol çekilen altytaraplaýyn demir ýol ylalaşygynyň yzýany bolup geçdi. Bu ylalaşygyň esasy maksady — Hytaýdan Ýewropa çenli Eýranyň üsti bilen geçýän netijeli söwda gatnaw ugruny giňeltmekdir.
«Gündogar–Günbatar» demir ýol geçelgesiniň optimizirlenilmeginiň netijesinde ýük daşamagyň wagty deňiz ugurlary bilen deňeşdirilende üçden bir bölegi gysgalyp biler. Eýranyň ilkinji otlusynyň Türkmenistanyň üsti bilen Özbegistana ugradylmagy Aziýa bilen Ýewropany birleşdirýän strategiki ugruň esasy üstaşyr halkasy hökmünde Türkmenistanyň ornuny tassyklady.
ORIENT
