Türkmenistan bilen Italiýanyň arasyndaky ikitaraplaýyn gatnaşyklary pugtalandyrmaga ygrarlylyk tassyklanyldy
2025-nji ýylyň 28-nji noýabrynda günüň ikinji ýarymynda Italiýanyň Döwlet Kwirinal köşgünde Türkmenistanyň Italiýa Respublikasyndaky Adatdan daşary we Doly ygtyýarly ilçisi T.Kömekow bilen Italiýa Respublikasynyň Prezidentiniň diplomatik geňeşçisi Fabio Kassezeniň arasynda duşuşyk geçirildi.
Duşuşygyň dowamynda taraplar şu ýylyň oktýabrynda Türkmenistanyň Prezidentiniň Italiýa Respublikasyna amala aşyran saparynyň çäklerinde iki ýurduň ýolbaşçylarynyň arasynda gazanylan ylalaşyklara laýyklykda hyzmatdaşlygyň ileri tutulýan ugurlaryny ara alyp maslahatlaşdylar. Şeýle hem halkara guramalarynyň çäklerinde ikitaraplaýyn gatnaşyklaryň ösdürilmegi, 2026-njy ýylda syýasy-diplomatik, ylmy-medeni we söwda-ykdysady ugurlarda hyzmatdaşlygy mundan beýläk-de berkitmek boýunça ädimler ara alnyp maslahatlaşyldy.
Duşuşykda BMG-niň Baş Assambleýasynyň Kararnamasy bilen ykrar edilen Türkmenistanyň hemişelik Bitaraplyk derejesine aýratyn üns berildi. Bu derejäniň sebitde we bütin Ýewraziýada parahatçylygy hem-de durnuklylygy berkitmäge goşant goşýandygy bellenildi.
Italiýa Respublikasynyň Prezidentiniň diplomatik geňeşçisi Fabio Kasseze Italiýa Respublikasynyň Prezidentiniň adyndan türkmen halkynyň Milli Lideri Gurban¬guly Berdimuhamedowa hem-de hormatly Prezidentimiz Serdar Berdimuhamedowa mähirli salam ýollady we çuňňur hormatyny beýan etdi. Şeýle hem 2025-nji ýylyň 12-nji dekabrynda Aşgabatda Halkara parahatçylyk we ynanyşmak ýyly, Halkara Bitaraplyk güni hem-de Türkmenistanyň hemişelik Bitaraplygynyň 30 ýyllygy mynasybetli geçiriljek Halkara forumyň ýokary derejede geçmegini arzuw etdi.
Duşuşygyň ahyrynda taraplar Türkmenistan bilen Italiýa Respublikasynyň arasyndaky gatnaşyklaryň mundan beýläk-de pugtalandyrylmagy ugrunda işjeň dialogy dowam etdirmäge taýýardyklaryny tassyklap, biri-birine iň gowy arzuwlaryny beýan etdiler.
ORIENT
