Kataryň «Al Sharq» gazetinde Türkmenistanyň hemişelik Bitaraplygynyň 30 ýyllygyna bagyşlanan makala çap edildi
Kataryň öňdebaryjy «Al Sharq» gazetinde Türkmenistanyň hemişelik Bitaraplygynyň 30 ýyllygyna bagyşlanan makala çap edildi. Makalada 1995-nji ýylyň 12-nji dekabrynda BMG-niň Baş Assambleýasy tarapyndan ykrar edilen Türkmenistanyň hemişelik Bitaraplyk derejesiniň ýurdumyzyň daşary syýasatynyň esasyny emele getirendigi hem-de döwletimiziň halkara derejesindäki abraýyny has-da berkitmäge hyzmat edendigi aýratyn nygtalýar.
Gazetde bellenilşi ýaly, geçen üç onýyllygyň dowamynda Türkmenistan parahatçylyk, ynanyşmak we hoşniýetli goňşuçylyk ýörelgelerini yzygiderli öňe sürýär. Munuň özi ýurdumyzyň dünýä bileleşiginde ýokary abraý gazanmagyna getirdi. Makalada bitaraplyk derejesiniň BMG tarapyndan iki gezek tassyklanyp, 12-nji dekabr bolsa Halkara Bitaraplyk güni hökmünde yglan edilendigi bellenilýär.
«Al Sharq» 2025-nji ýylyň 12-nji dekabrynda Aşgabatda Halkara parahatçylyk we ynanyşmak ýylyna, Halkara Bitaraplyk gününe hem-de Türkmenistanyň hemişelik Bitaraplygynyň 30 ýyllygyna bagyşlanan halkara forumyň geçiriljekdigine üns çekýär. Şeýle hem Türkmenistanyň BMG-niň Baş Assambleýasynyň meýdançasynda ählumumy durnuklylygy, durnukly ösüşi we halkara howpsuzlygy pugtalandyrmaga gönükdirilen möhüm başlangyçlary yzygiderli öňe sürýändigi aýdylýar.
Makalada Türkmenistanyň oňyn bitaraplygy döwlet syýasatynyň strategik binýady bolandygy aýratyn bellenýär. Yzygiderli ýöredilýän syýasatyň netijesinde Türkmenistan sebit we halkara hyzmatdaşlygynyň möhüm merkezleriniň birine öwrüldi hem-de dünýäniň köp döwletleri bilen deňhukukly we özara bähbitli gatnaşyklary üstünlikli ösdürýär.
ORIENT
