Almatyda Merkezi Aziýa ýurtlarynyň Daşary işler ministrleriniň orunbasarlarynyň duşuşygy geçirildi
Almatyda 28-nji noýabrda Merkezi Aziýanyň ýurtlarynyň Daşary işler ministrleriniň orunbasarlarynyň 15-nji ýyllyk duşuşygy geçirildi. Çäre Gazagystan Respublikasynyň Daşary işler ministrligi tarapyndan, BMG-niň Merkezi Aziýa üçin Öňüni alyş diplomatiýasy boýunça sebit merkezi (UNRCCA) bilen hyzmatdaşlykda guraldy. Duşuşyga, BMG-niň Owganystana ýardam etmek missiýasynyň we BMG-niň syýasy meseleler departamentiniň wekilleri hem gatnaşdylar.
Türkmen tarapyna Türkmenistanyň Gazagystandaky ilçisi Batyr Rejepow wekilçilik etdi. Ol Türkmenistanyň howpsuzlygy, durnukly ösüşi we sebit hyzmatdaşlygyny pugtalandyrmaga gönükdirilen çäreleriniň, BMG-nyň Baş Assambleýasynyň kararnamalary bilen ykrar edilen we berkidilen hemişelik bitaraplyk ýörelgelerine esaslanýandygyny nygtady.
Diplomatlar sebit we halkara gün tertibiniň möhüm meselelerini, şol sanda sebit hyzmatdaşlygy (söwda we ykdysadyýet), ulag-logistika ugurlaryny, suw-energetika we howa bilen baglanyşykly meseleleri ara alyp maslahatlaşdylar.
Şeýle hem, Merkezi Aziýadaky parahatçylyga we howpsuzlyga täsir edýän wakalar we tendensiýalar baradaky pikir alyşmalar geçirildi. Munuň bilen baglylykda, bu duşuşyklaryň ýaramaz ýagdaýlara wagtynda jogap bermek we bilelikdäki çäreleri täze güýçli howplara uýgunlaşdyrmak boýunça möhüm orny nygtaldy.
ORIENT
