Türkmenistanyň Prezidenti “Altyn Kyran”ordeni bilen sylaglandy
Gazagystanyň Prezidenti Türkmenistanyň Prezidentine “Altyn Kyran” (Gazagystan Respublikasynyň iň ýokary derejeli ordeni – “Altyn Bürgüt”) ordeni bilen sylaglaglady.
“Siziň ýurduňyzda senagat we ulag infrastrukturasy işjeň ýagdaýda döwrebaplaşdyrylýar. Energetika mümkinçiligini pugtalandyrmak we tehnologik özgertmeleri amala aşyrmak boýunça giň gerimli işler alnyp barylýar. Siziň öňdengörüjilikli başlangyçlaryňyzyň netijesinde doganlyk Türkmenistanda iri möçberli durmuş ugurly taslamalar maksatnamalaýyn esasda durmuşa geçirilýär, ylym-bilim ulgamlary gyşarnyksyz ösdürilýär, raýatlaryň hal-ýagdaýy yzygiderli ýokarlanýar. Bu üstünlikleriň hemmesi tüýs ýürekden hormata we iň ýokary baha mynasypdyr” – diýip, Prezident Kasym-Žomart Tokaýew aýtdy.
BMG-niň Baş Assambleýasy tarapyndan goldanylan, Türkmenistanyň 2025-nji ýyly “Halkara parahatçylyk we ynanyşmak ýyly” diýip yglan etmek baradaky başlangyjy ýurduň jogapkärli we işjeň garaýşynyň aýdyň tassyklanmasy boldy diýip, gazak Lideri sözüniň üstüni ýetirdi.
“Ynanýaryn, gazak-türkmen gatnaşyklarynyň geljegi ulydyr. Şu günki gepleşikleriň netijeleri munuň aýdyň subutnamasy boldy. Gazanylan ylalaşyklaryň üstünlikli durmuşa geçirilmeginiň köpugurly hyzmatdaşlygymyza güýçli itergi berjekdigine, gazak-türkmen gatnaşyklarynyň ýyl ýazgylarynda täze sahypany açjakdygyna şübhe ýok” – diýip, Kasym-Žomart Tokaýew aýtdy.
Serdar Berdimuhamedow Kasym-Žomart Tokaýewe we tutuş doganlyk Gazagystanyň halkyna ýokary döwlet sylagy – “Altyn Kyran” ordeni üçin minnetdarlyk bildirdi.
“Bu hakykaty Türkmenistanyň halkyna bolan ýokary hormatyň alamaty, köp asyrlaryň dowamynda halklarymyzy birleşdirýän berk dostlugyň we hoşniýetli goňşuçylygyň subutnamasy hökmünde kabul edýärin. Biziň halkara derejesinde ýakyn we netijeli hyzmatdaşlygymyz häzirki wagtda sebitleýin we ählumumy gün tertibindäki möhüm meseleleri çözmekde özara düşünişmegiň, raýdaşlygyň we birek-biregi goldamagyň ýokary derejesini aýdyň görkezýär” – diýip, Türkmenistanyň Prezidenti aýtdy.grusy
