Maşatdaky brifingde YHG-niň žurnalynyň Türkmenistan baradaky ýörite sany tanyşdyryldy
Türkmenistanyň Eýran Yslam Respublikasyndaky (Maşat) Baş konsullygynda Türkmenistanyň halkara gün tertibiniň möhüm meselelerine — Halkara parahatçylyk we ynanyşmak ýylyna hem-de hemişelik bitaraplygyň 30 ýyllygyna bagyşlanan brifing geçirildi.
Çärä «Maghtymguly» neşir merkezi, «Turkmen Diyar» žurnaly, şeýle hem «Ulkamiz» we «Sachag» jemgyýetçilik maglumat agentlikleri ýaly Eýranyň öňdebaryjy köpçülikleýin habar beriş serişdeleriniň wekilleri gatnaşdylar.
Brifing Baş konsullyk tarapyndan guralan sergi bilen başlandy. Sergide türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň kitaplary, ylmy işleri, şeýle hem amaly-haşam sungatynyň eserleri görkezildi.
Iň möhüm wakalaryň biri «ECO Heritage» žurnalynyň ýörite sanynyň tanyşdyrylmagy boldy. Bu ýörite sany Halkara parahatçylyk we ynanyşmak ýylyna hem-de Türkmenistanyň Bitaraplygynyň 30 ýyllygyna bagyşlanyp, Ykdysady Hyzmatdaşlyk Guramasynyň (OES) Medeniýet instituty, Türkmenistanyň EYR-däki Ilçihanasy hem-de Baş konsullygy tarapyndan taýýarlanyldy. Neşir Türkmenistanyň daşary syýasatynyň ýörelgelerini açyp görkezýän ähmiýetli gollanma hökmünde çykyş edýär.
Türkmenistanyň Maşatdaky Baş konsuly Guwançmyrat Ataýew çykyşynda Türkmenistanyň Prezidenti Serdar Berdimuhamedowyň ýolbaşçylygynda ýurdumyzyň içeri we daşary syýasatynyň ykdysady hem-de syýasy gatnaşyklaryň özara peýdaly hem-de oňyn ugurlar boýunça täze, has belent derejä çykmagyna gönükdirilendigini aýratyn nygtady.
Baş konsul bitaraplyk syýasatyny ýöredýän Türkmenistanyň sebitde parahatçylygy, howpsuzlygy we durnukly ösüşi berkitmek ugrunda alyp barýan işlerine giňişleýin ünsi çekdi.
«Türkmenistan sebitiň hem-de tutuş dünýäniň derejesinde özara ynanyşmak medeniýetini işjeň ösdürýär. Bitaraplyk syýasatymyzyň passiw saýlawy däl-de, durnuklylygy goldamak we konstruktiw dialoga ýardam bermek üçin netijeli guraldyr»- diýip, Guwançmyrat Ataýew belledi.
Maşatdaky brifing Eýranyň köpçülikleýin habar beriş serişdelerine Aşgabat tarapyndan öňe sürülýän möhüm halkara başlangyçlary barada giň maglumat bermekde möhüm meýdança bolup çykyş etdi hem-de goňşy ýurtlaryň arasynda medeni we maglumat alyş-çalyşynyň mundan beýläk hem güýçlenmegine ýardam etdi.
ORIENT
