Frankfurtda Türkmenistanyň Bitaraplygynyň ýubileýi mynasybetli dabaraly kabul edişlik geçirildi
Türkmenistanyň Germaniýa Federatiw Respublikasyndaky (Maýn boýundaky Frankfurt şäheri) Konsullygy Türkmenistanyň Bitaraplygynyň 30 ýyllygyna, Halkara Parahatçylyk we Ynanyşmak Ýylyna, şeýle hem Halkara Bitaraplyk Gününe bagyşlanan dabaraly kabul edişlik gurady.
Dabara Hessen federal ýeriniň Döwlet kansellariýasynyň wekilleri, maliýe institutlarynyň we bank düzümleriniň hünärmenleri, Hessende akkreditirlenen diplomatik wekilhanalaryň ýolbaşçylary, medeniýet we ylmy jemgyýetçiligiň işgärleri, türkmen diasporasynyň wekilleri hem-de talyp ýaşlar gatnaşdy.
Myhmanlara ýüzlenip çykyş eden Türkmenistanyň konsuly ýurdumyzy üç onýyllygyň dowamynda içeri we daşary syýasatynyň berk binýady bolup hyzmat edýän bitaraplyk derejesiniň aýratyn ähmiýetini belledi. Şunda ýurdumyzyň oňyn bitaraplyk syýasatynyň sebit howpsuzlygyny berkitmäge, özara bähbitli halkara gatnaşyklary giňeltmäge hem-de ykdysady ösüşi üpjün etmäge ýardam berýändigi nygtaldy.
Mundan başga-da, türkmen halkynyň milli Lideri Gurbanguly Berdimuhamedowyň öňe süren, häzirki wagtda Türkmenistanyň Prezidenti Serdar Berdimuhamedow tarapyndan üstünlikli amala aşyrylýan parahatçylyga, ynanyşmaga we durnukly ösüşe gönükdirilen halkara parahatçylyk söýüjilik başlangyçlaryň möhüm ornuna aýratyn üns berildi.
Çykyşda, 2025-nji ýylyň 12-nji dekabrynda Aşgabatda Halkara Parahatçylyk we Ynanyşmak Ýylyna, Halkara Bitaraplyk Gününe hem-de Türkmenistanyň hemişelik Bitaraplygynyň 30 ýyllygyna bagyşlanyp geçiriljek halkara forumynyň aýratyn ähmiýeti bellenildi.
Forumyň halkara syýasatyň, durnukly ösüşiň, ynsanperwer hyzmatdaşlygyň möhüm meselelerini we BMG-niň parahatçylyk döredijilik tagallalarynda bitarap döwletleriň ornuny giňeltmek boýunça meseleleri ara alyp maslahatlaşmak üçin möhüm meýdança boljakdygy aýdyp geçildi.
Çyşyk tamamlanandan soň, Türkmenistanyň Garaşsyzlygy ýyllarynda gazanylan üstünlikleri hem-de ýurduň oňyn Bitaraplygynyň halkara derejesindäki ähmiýeti barada gürrüň berýän wideoşekil görkezildi.
Dabaranyň çäginde gatnaşyjylar Türkmenistanyň bitaraplygynyň ähmiýeti we ýurduň halkara arenasyndaky parahatçylyk döredijilik başlangyçlary boýunça pikir alyşdylar.
Myhmanlara dabaranyň dowamynda türkmen milli tagamlary hödürlenildi.
ORIENT
