Türkmenistanda maýningi we sanly aktiwler bazaryny ösdürmek üçin Ýol kartasy işlenip düzüldi
Prezident Serdar Berdimuhamedow ýurduň sanly ykdysadyýetiniň geljekki bäş ýylda ösüşini kesgitlejek möhüm resminamanyň taslamasyny tassyklady: Türkmenistanda wirtual aktiwleri düzgünleşdirmegiň we maýning tehnologiýasyny ornaşdyrmagyň 2026 — 2030-njy ýyllar üçin Ýol kartasy.
Ýol kartasynyň taslamasy barada Ministrler Kabinetiniň mejlisinde wise-premýer Hojamyrat Geldimyradow hasabat berdi. Döwlet Baştutany tarapyndan tassyklanan, ykdysadyýete sanly tehnologiýalary ornaşdyrmak baradaky teklip pudagyň işjeň ösüşine geçişiň alamatydyr.
Bu resminama Türkmenistanda sanly aktiwleriň bazarynyň ygtybarly esasda hereket etmegi üçin hukuk, tehnologik we guramaçylyk binýadyny kemala getirmegi göz öňünde tutýar.
Ýol kartasynda aşakdaky strategik ugurlary öz içine alýan anyk çäreler we olary durmuşa geçirmegiň möhletleri kesgitlenilýär: ýurduň ykdysadyýetine maýning tehnologiýalaryny ornaşdyrmak; sanly pudak üçin zerur bolan energetika we aragatnaşyk infrastrukturasyny ösdürmek; maýa goýumlaryny çekmek, synag taslamalaryny geçirmek, kiberhowpsuzlygy üpjün etmek we energiýa netijeliligini ýokarlandyrmak; şeýle hem wirtual aktiwler bilen işlemek üçin ýokary hünärli hünärmenleri taýýarlamak.
Ýol kartasynyň taslamasy bilen birlikde, bäş ýyllyk strategiýanyň durmuşa geçirilmegine gözegçilik etmek üçin ýörite döwlet Baştutanynyň garamagyna Döwlet toparyny döretmek baradaky teklip hem hödürlenildi.
ORIENT
