Tatarystan söwda dolanyşygyny artdyrmak üçin Türkmenistanda Söwda öýüni açmagy meýilleşdirýär
Aşgabatda Söwda-ykdysady, ylmy-tehniki we medeni hyzmatdaşlyk boýunça bilelikdäki türkmen-tatar iş toparynyň 10-njy mejlisi geçirildi. Ýubileý duşuşygyna gatnaşmak üçin Russiýa Federasiýasynyň Tatarystan Respublikasynyň Premýer-ministriniň orunbasary, senagat we söwda ministri Oleg Korobçenkonyň ýolbaşçylygyndaky wekiliýet Türkmenistana sapar bilen geldi.
Toparyň başlyklary ikitaraplaýyn gatnaşyklaryň ýokary derejesine ünsi çekdiler we bilelikdäki taslamalaryň uly mümkinçiliklerini iň ýokary derejä çykarmak üçin özara isleglerini bellediler. Taraplar söwda we ykdysadyýet, nebit we gaz, energiýa, senagat, ulag we logistika, şeýle hem oba hojalygy, saglygy goraýyş we maglumat tehnologiýalary ulgamlarynda hyzmatdaşlyk etmek ýaly ileri tutulýan ugurlary kesgitläp, hyzmatdaşlygy has-da çuňlaşdyrmaga ygrarlydyklaryny tassykladylar.
Saparyň dowamynda Tatarystanyň wekilleri “Türkmennebit”, “Türkmengaz” DK-niň, “Türkmenenergo” korporasiýasynyň ýolbaşçylary, şeýle hem Söwda-senagat edarasynyň we Senagatçylar we telekeçiler birleşmesiniň wekilleri bilen duşuşyklary geçirdiler.
Oleg Korobçenko Tatarystanyň kompaniýalarynyň — “Tatneft” (nebit we gaz), “KER-Holding” (energetika we senagat) we “Kazanyň dikuçar zawody” — eýýäm Türkmenistanda birnäçe iri we geljegi uly taslamalary üstünlikli durmuşa geçirýändiklerini nygtady. Respublika ykdysady we maýa goýum gatnaşyklaryny, esasan hem maşyn gurluşygynda, energetikada we nebit önümçiliginde giňeltmäge gyzyklanma bildirýär.
Türkmenistan Merkezi Aziýada “KAMAZ” awtoulaglaryna iň köp isleg bildirýän ýurtlaryň biridir. Ýurtda bu markanyň awtoulag parky 10 müňden gowrak birlige eýedir. Bu bolsa hyzmatdaşlygyň çuňlugyny tassyklanýar.
Wise-premýer Oleg Korobçenko Türkmenistanda Tatarystanyň Söwda öýüni açmak meýilnamasy barada habar berdi. Bu çäre ikitaraplaýyn söwda dolanyşygyny ep-esli artdyrmaga gönükdirilendir, 2024-nji ýylyň maglumatlaryna görä, bu möçber takmynan 35 million dollara deň boldy. Tatarystanyň wekiliýetiniň ýolbaşçysy işjeň hyzmatdaşlygyň netijesinde bu görkezijiniň şu ýyl 50 million dollara çenli ýokarlanjakdygyna ynam bildirdi.
Türkmenistanda amala aşyrylýan özgertmeleriň, şeýle hem ykdysadyýeti diwersifikasiýalaşdyrmak we sanlylaşdyrmak ugrynyň bilelikdäki taslamalar üçin täze we giň mümkinçilikleri döredýändigi aýratyn nygtaldy.
ORIENT
