Gurbanguly Berdimuhamedow adyndaky haýyr-sahawat gaznasynyň wise-prezidenti RF-iň Federasiýa Geňeşiniň Başlygy bilen duşuşdy
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa Sankt-Peterburgda geçirilýän “Arkalaşygyň modasy” forumynda türkmen wekiliýetine ýolbaşçylyk edýär.
20-nji noýabrda Oguljahan Atabaýewa Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenko bilen duşuşyk geçirdi.
Federasiýa Geňeşiniň Başlygy Russiýanyň Türkmenistanyň gazananlaryny, onuň halkara giňişligindäki üstünliklerini üns bilen yzarlaýandygyny belledi. Walentina Matwiýenko türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowa tüýs ýürekden gutlaglaryny we iň gowy arzuwlaryny ýe’tirmegi haýyş etdi. Ol iki ýurduň ýolbaşçylarynyň işjeň şahsy gatnaşygy we hyzmatdaşlygy netijesinde Russiýa bilen Türkmenistanyň arasyndaky gatnaşyklaryň dostluk we özara düşünişmek ruhunda depginli ösýändigini nygtady.
Federasiýa Geňeşiniň Başlygy Russiýanyň şeýle hem Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan işleriniň möhümdigini we jemgyýetçilik ähmiýetini belledi. Ol Russiýanyň “Ýagşylygyň topary” gaznasynyň hem şunuň ýaly işleri alyp barýandygyny belledi.
“Arkalaşygyň modasy” atly forumynyň çäreleri barada gürrüň edip, Walentina Matwiýenko şu ýyl Sankt-Peterburgda Türkmenistanyň iň wekilçilikli sergileriň birini hödürleýändigini belledi. Türkmenistan ýeňil senagatda we döredijilik pudagynda baý däplere eýedir.
Federasiýa Geňeşiniň Başlygy 30-dan gowrak ýurduň wekilleriniň gatnaşmagynda geçirilýän “Arkalaşygyň modasy” atly forumynyň eýýäm çynlakaý integrasiýa guralyna öwrülendigini, onuň meýdançasynda tejribe alyş-çalşygyň, moda we dizaýn ulgamynda däp-dessurlaryň saklanmagynyň we giňden ýaýradylmagynyň, medeniýetleriň özara baýlaşmagynyň we janly dialogyň bolup geçýändigi bellenildi. Ýeňil senagaty goldamakdan başga-da, forum GDA-nyň ýurtlarynda önümleri mahabatlandyrýar we ýaş dizaýnerleriň zehinlerini ösdürmäge ýardam edýär. “Bu, Russiýanyň sebitlerindäki önüm öndürijiler üçin GDA-nyň bazarlaryna girmek üçin hakyky itergi boldy”.
Oguljahan Atabaýewa forumyň çäreleriniň täsirli bolandygyny belledi. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Gaznanyň alyp barýan işi barada gürrüň berdi.
Gatnaşyjylar medeni we ynsanperwer ulgamlardaky hyzmatdaşlyk barada pikir alyşdylar.
Duşuşyga Federasiýa Geňeşiniň Başlygynyň orunbasary Inna Swýatenko, Federasiýa Geňeşiniň Durmuş syýasaty boýunça komitetiniň başlygynyň orunbasary Ýuliýa Lazutkina we GDA-nyň Parlamentara Assambleýasynyň Geňeşiniň Baş sekretary Dmitriý Kobitskiý gatnaşdylar.
Duşuşykdan soň Walentina Matwiýenko we Oguljahan Atabaýeva forumyň meýdançasyndaky Türkmenistanyň we beýleki ýurtlaryň sergilerini synladylar.
Federasiýa Geňeşiniň Başlygy sergi boýunça gezelenç mahalynda özboluşly däp-dessurlary saklamagyň, önümiň bäsdeşlige ukyplylygyny ýokarlandyrmak üçin bar bolan artykmaçlyklardan peýdalanmagyň we daşary ýurt bazarlaryndaky gatnaşygy giňeltmegiň möhümdigini belledi.
Gözden geçirişden soň žurnalistler bilen söhbetdeş bolan Walentina Matwienko sergilerde görkezilýän modaly, döwrebap önümlere milli däp-dessurlaryň nähili ussatlyk bilen we dürli reňkli öwüşgin bilen örülýändigini nygtady.
“Hödürlenen zatlar ylham beriji. GDA-nyň ýurtlary däp-dessurlaryny saklap, täze ösüşleri görkezýärler. Forumyň meýdançasyna bolan isleg ýyl saýyn artýar. Täze ylalaşyklara, şertnamalara we geleşiklere gol çekildi. Biz hyzmatdaşlygymyzy has-da ösdürmegi we pugtalandyrmagy maksat edinýäris” – diýip, Federasiýa Geňeşiniň Başlygy aýtdy.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa Russiýa Federasiýasynyň Federal Ýygnagynyň Federasiýa Geňeşiniň Başlygy Walentina Matwiýenkonyň çakylygy boýunça Sankt-Peterburga saparyny amala aşyrýar edýär.
Saparyň esasy maksady “Arkalaşygyň modasy” atly IV halkara forumyna gatnaşmakdan ybratdyr. Oguljahan Atabaýewa “Arkalaşygyň modasy” atly IV halkara forumynda “Sagdyn bolmak moda” atly sessiýada çykyş eder we haýyr-sahawat gaznasynyň işi barada gürrüň berer.
Forumyň gurmaçylary bolup GDA-nyň Parlamentara Assambleýasy we Russiýa Federasiýasynyň Federal Ýygnagynyň Federasiýa Geňeşi çykyş edýär.
Saparyň çäginde döwlet, jemgyýetçilik we işewür toparlaryň wekilleri bilen ynsanperwer ulgamda hyzmatdaşlyk etmek, çagalara goldaw bermek, medeni we haýyr-sahawat başlangyçlaryny ösdürmek meselelerini ara alyp maslahatlaşmak üçin ikitaraplaýyn duşuşyklar hem geçiriler.
Russiýa Federasiýasynyň Demirgazyk paýtagtyna saparyň ilkinji günlerinde, 19-njy noýabrda, wekiliýet dünýäniň iň uly we iň meşhur muzeýleriniň birine – Döwlet Ermitaž muzeýine baryp gördüler.
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy howandarlyga mätäç çagalaryň ýaşaýyş-durmuşynyň derejesini ýokarlandyrmaga gönükdirilen halkara taslamalaryna işjeň gatnaşýar. Sankt-Peterburga amala aşyrylýan sapar Türkmenistanyň ynsanperwer gatnaşyklary pugtalandyrmaga we çagalaryň durmuş goraglylygy ulgamynda tejribe alyşmaga ygrarlydygyny görkezýär.
ORIENT
