Bitaraplygyň 30 ýyllygyna: Türkmenistanyň Hyrat şäherindäki Baş konsullygy çäre geçirdi
20-nji noýabrda Türkmenistanyň Owganystanyň Hyrat şäherindäki Baş konsullygy «Arg» myhmanhanasynyň mejlisler zalynda dabaraly çäre geçirdi.
Türkmenistanyň hemişelik Bitaraplygynyň 30 ýyllygy mynasybetli guralan çärä Hyrat welaýatynyň häkimi, BMG-niň Owganystana ýardam bermek boýunça missiýasynyň wekilleri, Hyratdaky konsullyk edaralarynyň ýolbaşçylary hem-de Hyrat we Bathyz welaýatlarynda kowçum bolup ýaşaýan türkmen diasporasynyň abraýly wekilleri gatnaşdylar. Bu barada Türkmenistanyň Hyratdaky Baş konsullygy habar berdi.
Çäräniň dowamynda Türkmenistanyň hemişelik Bitaraplygynyň halkara jemgyýetçiligi tarapyndan ykrar edilmeginiň ähmiýeti barada bellenip geçildi.
Bitarap Türkmenistanyň dünýäde parahatçylygy we howpsuzlygy pugtalandyrmaga, döwletleriň we halklaryň arasyndaky özara düşünişmegi ösdürmäge, dostlukly, ynanyşmaga esaslanýan we netijeli hyzmatdaşlyk gatnaşyklaryny öňe sürmäge hem-de Durnukly ösüş maksatlaryna ýetmäge saldamly goşant goşýandygy barada aýdyldy.
Mundan başga-da, çäräniň çäklerinde Bitaraplygyň 30 ýyllygyna bagyşlanan wideorolikler görkezildi hem-de türkmen halkynyň baý medeni mirasyny tanyşdyrýan sergi guraldy. Sergi çärä gatnaşyjylarda aýratyn täsir galdyrdy.
Çäräniň ahyrynda ähli gatnaşyjylara we myhmanlara türkmen milli tagamlary hödürlendi.
ORIENT
