Türkmenistanyň Marokko Patyşalygyndaky Ilçisi ynanç hatlaryny gowşurdy
Türkmenistan bilen Marokko Patyşalygy ikitaraplaýyn gatnaşyklarda täze sahypa açýarlar. Golaýda Rabat şäherinde Türkmenistanyň Marokko Patyşalygyndaky täze bellenen Adatdan daşary we Doly ygtyýarly Ilçisi (oturýan ýeri Ankara şäheri) Mekan Işangulyýewiň resmi ýagdaýda ynanç hatlaryny gowşurmak dabarasy geçirildi. Resminamany Marokko Patyşalygynyň Daşary işler, Afrika hyzmatdaşlygy we daşary ýurtlarda ýaşaýan marokkolylaryň işleri boýunça Ministri Nasser Burita kabul etdi.
Geçirilen ikitaraplaýyn duşuşygyň çäklerinde Ilçi M.Işangulyýew Türkmenistanyň Prezidenti Serdar Berdimuhamedowyň hem-de Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň Marokkonyň Patyşasy Muhammet VI adyna ýollan mähirli salamlaryny we iň gowy arzuwlaryny ýetirdi.
Öz gezeginde, Ministr N.Burita ýetirilen mähirli salamlar we hoşniýetli arzuwlar üçin çuňňur hoşallyk bildirdi hem-de Marokkonyň Patyşasy Muhammet VI adyndan Türkmenistanyň ýolbaşçylygyna dostlukly salamlary we hoşniýetli arzuwlary ýetirmegi haýyş etdi.
Gepleşikleriň dowamynda taraplar özara gatnaşyklary pugtalandyrmak, şol sanda syýasy, söwda-ykdysady we medeni-ynsanperwer ugurlardaky hyzmatdaşlygy ösdürmek baradaky meseleleri ara alnyp maslahatlaşdylar.
Taraplar şu ýylyň 12-nji dekabrynda Aşgabat şäherinde geçirilmegi meýilleşdirilýän Halkara parahatçylyk we ynanyşmak forumyna taýýarlyk meseleleri boýunça pikir alyşdylar. Bu ara alyp maslahatlaşma iki ýurduň parahatçylygy we durnuklylygy berkitmek üçin bilelikde işleşmäge ygrarlydygyny nygtady.
ORIENT
