Türkmen talyplary ISTCiM-2025 halkara olimpiadasynda kümüş medal gazandy
6–9-njy noýabr aralygynda Polşada Katowisedäki Sileziýa uniwersiteti tarapyndan gurnalan VII Halkara talyp toparlaýyn matematika olimpiadasy (ISTCiM-2025) geçirildi. Türkmen talyplary ýokary taýýarlyk derejesini görkezip, iki sany kümüş medala mynasyp boldylar.
Bu abraýly bäsleşikde gazanylan ýeňişler Türkmenistanyň hemişelik Bitaraplygynyň 30 ýyllygyna özboluşly sowgat boldy.
Ýagşygeldi Kakayew adyndaky Halkara nebit we gaz uniwersitetiniň talyplary aýratyn tapawutlandy:
• Kerimguly Bendow aýratynlykda çykyş edip, ikinji orny eýeläp, kümüş medal gazandy.
• Ol Yslam Haýytmuhammedow bilen birlikde toparlaýyn hasapda hem Türkmenistana kümüş medal getirdi.
Olimpiadada Türkmenistanyň öňdebaryjy ýokary okuw mekdepleriniň ýedisinden toparlar çykyş etdiler. Olaryň arasynda Magtymguly adyndaky Türkmen döwlet uniwersiteti hem-de Oguz han adyndaky Inžener-tehnologiýa uniwersiteti bar.
ISTCiM-2025 bäsleşigi Awstriýa, Beýik Britaniýa, Polşa, Sloweniýa, Italiýa, Ispaniýa, Germaniýa we Fransiýa ýaly ýurtlaryň ýokary okuw mekdepleriniň talyplaryny jemläp, onuň halkara derejesiniň ýokarydygyny subut etdi.
Ýewropada gazanylan bu üstünlikler, ýurdumyzyň zehinli ýaşlarynyň dünýä derejesinde ykrar edilmegine mümkinçilik döredýän bilimi ösdürmek boýunça döwlet syýasatynyň netijelidigini görkezýär.
ORIENT
