Norwegiýanyň milli ýygyndysy 28 ýyldan soň ilkinji gezek dünýä çempionatyna çykdy
Futbol boýunça Norwegiýanyň milli ýygyndysy 1998-nji ýyldan bäri ilkinji gezek futbol boýunça dünýä çempionatynyň final tapgyryna gatnaşmaga hukuk gazandy. ABŞ-da, Kanadada we Meksikada geçiriljek DÇ-2026-nyň Ýewropadaky toparçalaýyn saýlama tapgyrynyň soňky duşuşygynda norwegiýalylar Italiýanyň ýygyndysyny 4:1 hasabynda ýeňip, «I» toparçada birinji orny eýelediler.
Şeýlelikde, Norwegiýa 28 ýyllyk arakesmeden soň dünýä çempionatyna çykdy. Soňky gezek norwegiýalylar 1998-nji ýylda Fransiýada geçirilen dünýä çempionatyna gatnaşyp, Braziliýa, Marokko we Şotlandiýa bilen bir toparçada çykyş edipdiler hem-de ikinji orny eýeläpdiler. Emma 1/8 finalda Italiýa bilen duşuşykda 0:1 hasabynda ýeňlipdiler.
Tamamlanan saýlama tapgyrynda Norwegiýa 8 duşuşykda 24 utuk toplap, Italiýany, Ysraýyly, Estoniýany we Moldowany yzda goýmagy başardy.
ORIENT
