BDÝ Türkmenistana ÝB ýurtlaryna gatnaw üçin öz infrastrukturasyny hödürledi
Belarussiýanyň Demir ýollary (BDÝ) döwlet birleşiginiň başlygynyň birinji orunbasary Aleksandr Horoşewiçiň ýolbaşçylygyndaky wekiliýet Aşgabatda geçirilýän ITTC – 2025 (Halkara ulag-üstaşyr geçelgeleri: özara arabaglanyşyk we ösüş — 2025») atly halkara maslahata we sergä gatnaşdylar. BDÝ-nyň Türkmenistanyň möhüm ulag forumyna gatnaşmagy iki ýurduň Ýewraziýa logistika ugurlaryny ösdürmekde hyzmatdaşlygynyň strategik ähmiýetini görkezdi.
Aleksandr Horoşewiç “Halkara hyzmatdaşlygy we maýa goýumlary – geljekki ulaglaryň hereketlendiriji güýji” atly panel sessiýasynda Belarussiýanyň demir ýolunyň ýük daşamak üçin mümkinçilikleri bilen tanyşdyryp, onuň infrastrukturasynyň her gün dürli ugurlarda hereket edýän 300 jübüt ýük otlularyna gündelik hyzmat edýändigini belledi.
Hasabatyň esasy temasy BDÝ bilen Türkmen demir ýollarynyň bilelikdäki taslamalary guramakda mundan beýläk-de hyzmatdaşlygy boldy. BDÝ-nyň wekili iki halkara ulag geçelgesiniň: “Gündogar – Günbatar – Gündogar” halkara ulag geçelgesiniň we “Demirgazyk – Günorta halkara ulag geçelgesiniň mümkinçiliklerinden peýdalanmagyň örän möhümdigini nygtady.
Belarus tarapy Aziýa-Ýuwaş ummany sebitiniň ýurtlaryndan ÝB-niň we Ýewraziýa Ykdysady Bileleşigiň ýurtlaryna demir ýol gatnawlaryny guramak üçin terminal infrastrukturasyny hödürläp, işjeň hyzmatdaşlyga taýýardygyny tassyklady. Aleksandr Horoşewiç BDÝ-nyň Belarusyň çägi boýunça üstaşyr ýük akymlarynyň päsgelçiliksiz geçmegini üpjün etmäge taýýardygyny aýtdy.
BDÝ-nyň başlygynyň orunbasary Türkmen demir ýollary bilen bilelikdäki tagallalaryň täze logistika ugurlaryny döretmek üçin deňagramly çözgütleri işläp düzmäge ýardam etjekdigine ynam bildirdi. Onuň aýtmagyna görä, bu hyzmatdaşlyk Aziýa-Ýuwaş ummany sebitine we yzyna ÝB we Ýewraziýa Ykdysady Bileleşigiň ýurtlaryna ýük daşamagyny ep-esli artdyrar.
Forumyň çäklerinde hyzmatdaşlygy pugtalandyrmak boýunça amaly işler dowam etdirildi. BDÝ-nyň wekiliýeti Türkmenistanyň Demir ýol ulaglary ministriniň orunbasary Silapberdi Nurberdiýew we Trans-Ýewraziýa ulaglary boýunça Halkara utgaşdyryjy geňeşiniň baş sekretary Mihail Gonçarow bilen iş duşuşyklaryny geçirdi. Bu duşuşyklaryň dowamynda, esasan hem iki ýurt üçin möhüm baglanyşyk bolan “Demirgazyk-Günorta” halkara ulag geçelgesiniň çäklerinde ýük daşamagy ösdürmekde mundan beýläk-de hyzmatdaşlygyň geljegi uly ugurlary ara alnyp maslahatlaşyldy.
ORIENT
