Daşkentdäki sergide türkmen suratkeşleriniň eserleri görkezilýär
12 — 16-njy noýabr aralygynda Özbegistan Respublikasynyň Daşkent şäherinde Merkezi Aziýanyň döwlet Baştutanlarynyň Ýedinji konsultatiw duşuşygy bilen ugurdaş «Merkezi Aziýa: umumy ruhy-medeni miras —umumy geljek» atly halkara kongressi geçirilýär.
Kongressiň işine Türkmenistanyň Suratkeşler birleşiginiň başlygy Çarymyrat Ýazmyradow hem-de Türkmenistanyň Döwlet çeperçilik akademiýasynyň mugallymy Baýram Bazarow hem gatnaşýarlar.
Çäräniň çäginde çeperçilik sergisi guralyp, onda türkmen suratkeşleri Çarymyrat Ýazmyradowyň, Hojamuhammet Çüriýewiň, Toýly Çopanowyň, Rahman Umarowyň, Maksat Hudaýberdiýewiň, Gahryman Goçmyradowyň eserleri görkeziler. Serginiň esasy maksady Merkezi Aziýa halklarynyň çeperçilik mirasyny we taryhy-medeni gymmatlyklaryny bir ýere jemlemekden we olar halkara jemgyýetçilige ýakyndan tanyşdyrmakdan ybaratdyr.
Mundan ozal, Merkezi Aziýa: umumy ruhy-medeni miras —umumy geljek» atly halkara kongresse medeniýet ministri A.Şamyradowyň ýolbaşçylygyndaky wekiliýetiň gatnaşýandygyny habar beripdik.
ORIENT
