DÇ-2026-nyň Ýewropadaky saýlamasy: Portugaliýa ýeňildi, Ronaldu gyzyl kart aldy
Düýn futbol boýunça 2026-njy ýyldaky dünýä çempionatynyň Ýewropadaky saýlamasynyň nobatdaky oýunlary geçirildi. Günüň esasy wakasy Irlandiýa — Portugaliýa oýny boldy. Portugaliýa ýeňiş gazanan halatynda DÇ-2026-a ýollanmany kepillendirmelidi. Emma duşuşyk 2:0 hasabynda Irlandiýanyň ýeňşi bilen tamamlandy. Üstesine, duşuşykda portugaliýalylaryň esasy oýunçysy Kriştianu Ronaldu gödek oýny üçin 61-nji minutda gyzyl kart aldy. Şeýlelikde, ol Portugaliýanyň ýygyndysynyň indiki 2 oýnunda meýdança çykyp bilmez. Bu diýildigi Portugaliýa DÇ-2026-a çykan halatynda, Ronaldunyň toparçalaýyn tapgyryň ilkinji oýna gatnaşyp bilmejekdigini aňladýar.
Portugaliýa saýlamanyň soňky tapgyryndaky oýnuny 16-njy noýabrda öz öýünde Ermenistan bilen geçirer. Şol oýundaky ýeňiş Roberto Martinesden tälim alýan topary mundiala alyp çykar.
Şeýle-de düýn Italiýa Moldowany 2:0, Angliýa Serbiýany 2:0, Norwegiýa Estoniýany 4:1 hasabynda utdy.
Ýeri gelende bellesek, häzirki wagtda Ýewropada diňe Angliýa we Fransiýa özleri üçin DÇ-2026-nyň ýollanmasyny wagtyndan öň kepillendirmegi başardylar.
ORIENT
