Hytaý patent üçin ýüz tutmalaryň sany boýunça dünýä liderligini özünde saklaýar
Bütindünýä intellektual eýeçilik guramasynyň (WIPO) maglumatlaryna görä, 2024-nji ýylda berlen ähli patent ýüz tutmalarynyň deň ýarysyna golaýy Hytaýyň paýyna düşdi. Has takygy, 2024-nji ýylda ýurt patent almak üçin 1,8 million ýüz tutma hasaba alnyp, bu görkeziji bir ýyl ozalkydan 9% köpdür. ABŞ bolsa 603 müň ýüz tutma bilen ikinji orny eýeläp, 2023-nji ýyl bilen deňeşdirilende işjeňligini azaltdy.
Liderleriň bäşligine Ýaponiýa, Koreýa Respublikasy we Germaniýa hem girdi. Şol bir wagtyň özünde ähli ýüz tutmalaryň 70%-den gowragy Aziýa ýurtlarynyň paýyna düşdi.
Şeýle-de Hytaý hasaba alnan patentleriň sany boýunça hem birinji orny eýeledi — 1 milliondan gowrak patent. ABŞ-da bolsa bu görkeziji, takmynan, 320 müň boldy. Umuman, 2024-nji ýylda dünýäde jemi 3,7 million sany patent üçin ýüz tutma berlip, bu görkeziji 2023-nji ýyldakydan 5% köpdür.
Innowasion işleriň öňdebaryjy ugurlary — kompýuter tehnologiýalary, elektrik inženerçiligi, ölçeg enjamlary, sanly aragatnaşyk we lukmançylyk tehnologiýalarydyr. Mundan başga-da, Hytaý haryt nyşanlaryny we senagat dizaýnlaryny hasaba almak babatda-da dünýäde öňdeligi saklap, degişlilikde 7,3 million we 825 müň ýüz tutma tabşyrdy.
ORIENT
