«Apple» «Google» kompaniýasyna «Gemini» arkaly «Sirini» kämilleşdirmek üçin ýylda, takmynan, 1 milliard dollar tölär
«Apple» kompaniýasy «Google» bilen ýörite taýýarlanylan «Gemini» atly emeli aň modeliniň täze wersiýasyny «Apple Intelligence» platformasyna ornaşdyrmak boýunça ylalaşyk baglaşdy. «Bloombergiň» žurnalisti Mark Gurmanyň maglumatlaryna salgylanyp, «The Verge» neşiriniň ýazmagyna görä, şertnamanyň bahasy ýylda, takmynan, 1 milliard dollara barabar.
Bellenilişi ýaly, «Gemini» emeli aň modeliniň ornaşdyrylmagy «Siri» sesli kömekçisiniň intellektual mümkinçiliklerini ep-esli ýokarlandyrar. Hususan-da, ol tekst görnüşindäki gysga mazmunlary döretmekde we meýilleşdiriş bilen bagly wezipeleri ýerine ýetirmekde has netijeli bolar.
«Apple» bu modeli özüne degişli «Private Cloud Compute» atly şahsy serwerlerinde işletmegi meýilleşdirýär. Bu bolsa kompaniýanyň ulanyjylaryň maglumatlarynyň gizlinligini goramak baradaky syýasatyna doly laýyk gelýär. Şol bir wagtyň özünde kompaniýa «Siri» ulgamynyň işlemegini üpjün etmek üçin öz emeli aň tehnologiýalaryny hem ulanmagyny dowam eder.
Gurmanyň maglumatlaryna görä, ulanyljak «Gemini» modeli 1,2 trillion ölçegi öz içine alar. Bu bolsa «Apple» tarapyndan döredilen «Apple Intelligence» platformasynyň bulut wersiýasynda bar bolan mukdardan 150 esse milliard ölçeg köpdür. Şeýlelikde, täze ulgam «Sirini» bazardaky iň ösen intellektual ulgamlaryň birine öwrüp biler.
ORIENT
