Türkmenistanyň wekiliýeti Duşenbede geçirilen hukugyň hökmürowanlygy boýunça Milli foruma gatnaşdy
Türkmenistanyň Adalat ministriniň orunbasary Batyr Myradowyň ýolbaşçylygyndaky türkmen wekiliýeti Duşenbe şäherinde geçirilen hukugyň hökmürowanlygy boýunça 11-nji Milli forumynyň işine gatnaşdy. Forum döwlet edaralarynyň, daşary ýurtlaryň adalat ministrlikleriniň, halkara guramalaryň, ylmy hem-de raýat jemgyýetçiligiň wekillerini bir ýerde jemledi.
Forumyň dowamynda gatnaşyjylar hukuk ulgamyny kämilleşdirmäge gönükdirilen esasy meseleleriň giň toplumyny ara alyp maslahatlaşdylar. Diňlenilen temalaryň merkezinde adalate elýeterliligi üpjün etmek, adam hukuklarynyň konstitusion kepilliklerini durmuşa geçirmek, raýat we telekeçilik kanunçylygyny ösdürmek, şeýle hem häzirki zaman jenaýat-hukuk syýasatyny kemala getirmek meseleleri boldy. Mundan başga-da, gatnaşyjylar hukugyň hökmürowanlygyny berkitmäge päsgel berýän hukuk we institusional böwetleri aradan aýyrmak meselelerine hem-de kanunçylyk ulgamynda öňdebaryjy halkara tejribesi bilen paýlaşmaga aýratyn üns berdiler.
Çäräniň dowamynda Türkmenistanyň wekili ýurdumyzyň hukuklaryň hökmürowanlygyny berjaý etmek ýörelgelerine ygrarlydygyny, milli kanunçylygy kämilleşdirmäge hem-de kazyýet-hukuk ulgamynyň netijeliligini ýokarlandyrmaga gönükdirilen yzygiderli özgertmeleriniň amala aşyrylýandygyny belledi. Şeýle hem hukuk binýadyny berkitmekde, raýatlaryň hukuklaryny goramakda we häzirki zaman hukuk medeniýetini kemala getirmekde halkara hyzmatdaşlygynyň möhüm ähmiýete eýedigini nygtady.
ORIENT
