Arkadag şäherinde özboluşly medeni gurşaw döredilýär – ahalteke bedewleriniň heýkelleri ýerleşdirilen seýilgäh
5-nji noýabrda, çarşenbe güni Arkadag şäherine iş saparynyň dowamynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow “Arkadag” seýilgähine baryp, ol ýerde onuň abadanlaşdyryş işlerini we binagärlik bezeg aýratynlyklaryny bilen tanyşdy. Ady rowaýata öwrülen bedewleriň heýkelleriniň ýerleşdirilmegine we söwda kerweniniň heýkelleriniň ýerleşdirilişine aýratyn üns berildi.
Türkmenistanyň Prezidentiniň ýanyndaky Arkadag şäheriniň gurluşygy boýunça döwlet komitetiniň başlygy we Arkadag şäheriniň häkimi ozal berlen tabşyryklara laýyklykda, alnyp barlan işler barada hasabat berdiler. Gurbanguly Berdimuhamedow bu ýerde görkezilýän şekilleri synlap, bu zatlaryň türkmen halkynyň milli gymmatlyklarynyň we taryhy mirasynyň nyşanlaryna öwrülmelidigini nygtady. Halk Maslahatynyň Başlygy “Halkymyzyň dünýä nusgalyk gymmatlyklary bolan ahalteke bedewleri, adamlaryň hemişelik hemrasy bolan alabaýlar, türkmen halkynyň taryhynyň aýrylmaz bölegine öwrülen ynsan gylykly arwana düýeleri milli buýsanjymyzdyr” diýip belledi hem-de bu babatda birnäçe belliklerini aýtdy we maslahatlaryny berdi.
Şonuň üçin seýilgähiň çäklerinde oturdyljak söwda kerweniniň şekilleri halkyň milli gymmatlyklaryna bolan ählihalk söýgüsini aňlatmalydyr. Bedewleriň heýkelleriniň her birine degişli ýazgylarda bedewleriň taryhyna, olaryň görkezen netijelerine bagyşlanan maglumatlaryň ýerleşdirilmelidigini bellenildi.
Bu çözgütler döwletiň täze şäheriň binagärlik giňişligini milli mirasy dowam etdirmek we taryhy nukdaýnazardan döwrebap medeni gurşawy döretmäge bolan maksatlaryny nygtaýar.
ORIENT
