Aşgabat Owganystana gynanç bildirdi we ynsanperwer kömegini bermäge taýýar
Türkmenistanyň DIM-de ministriniň orunbasary Ahmet Gurbanow bilen Owganystanyň Türkmenistandaky Işleri wagtlaýyn ynanylan wekili Fazal Muhammad Sabiriň arasynda duşuşyk geçirildi.
Duşuşygyň dowamynda ministriň orunbasary Owganystanyň demirgazygynda bolup geçen we adam pidalaryna hem-de şikes ýetmelere getiren ýer titremesi bilen baglanyşykly owgan diplomatyna duýgudaşlyk we goldaw sözlerini bildirdi.
Ahmet Gurbanow bu habaryň Türkmenistanda çuňňur gynanç bilen kabul edilendigini we ýurduň doganlyk Owganystanyň ilatyna golaý wagtda ynsanperwerlik kömegini bermäge taýýardygy barada aýtdy.
Türkmenistanyň DIM-i ýurduň türkmen halkynyň kyn günlerde goldaw bermek boýunça gadymy däplerini hormat bilen dowam etdirýändigini, munuň bolsa döwletleriň arasyndaky dostlukly gatnaşyklary we hoşniýetli goňşuçylygy pugtalandyrmagyň esasy bolup durýandygyny nygtady.
Muny Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy tarapyndan yzygiderli esasda iberilýän ynsanperwerlik kömeginiň mysalynda-da aýdyň görmek bolýar. Gazna dürli ýurtlarynyň, şol sanda Owganystanyň heläkçilikler zerarly ejir çeken çagalaryna we ilatyna yzygiderli kömek berýär, bu bolsa Türkmenistanyň goňşy halklary goldamaga ygrarlydygyny tassyklaýar.
ORIENT
