Özbegistan ABŞ raýatlary üçin wizasyz düzgüni girizýär
2026-njy ýylyň 1-nji ýanwaryndan başlap, ABŞ raýatlary üçin Özbegistana 30 güne çenli wizasyz girmek mümkinçiligi döredilýär. Bu çäre 3-nji noýabrda Prezident Şawkat Mirziýoýew tarapyndan gol çekilen karara laýyklykda amala aşyrylýar.
Täze düzgünleriň maksady hökmünde iki ýurduň söwda-ykdysady we medeni-ynsanperwer gatnaşyklarynyň, şeýle hem syýahatçylygyň has-da ösdürilmegi görkezilýär.
2021-nji ýyldan bäri ABŞ-nyň (we birnäçe beýleki ýurtlaryň) 55 ýaşdan ýokary bolan, syýahatçylyk maksady bilen Özbegistana gelýän raýatlary üçin 30 güne çenli wizasyz düzgün hereket edýär.
ABŞ raýatlary üçin doly wizasyz tertibi girizmek baradaky meýilnamalar şu ýylyň 15-nji maýynda çykan, ýurda gelýän syýahatçylaryň sanyny ep-esli artdyrmak baradaky prezidentiň kararynda hem beýan edilipdi.
Şol resminamada Özbegistanyň daşary işler ministrligine özbegistanly raýatlaryň ABŞ-a girişiniň wizasy bilen baglanyşykly talaplary ýeňilleşdirmek boýunça ABŞ bilen gepleşikleri başlamak tabşyrylypdy.
