Astarhanda «Parahatçylygyň, howpsuzlygyň we ösüşiň hatyrasyna Bitaraplygyň dostlary toparynyň duşugy» BMG-niň Modeli atly çäre geçirildi
2025-nji ýylyň 24-nji oktýabrynda Astrahan şäherindäki general-admiral F.M. Apraksiniň adyndaky Hazar deňiz we derýa ulaglary institutynda «Parahatçylygyň, howpsuzlygyň we ösüşiň hatyrasyna Bitaraplygyň dostlary toparynyň duşugy» atly BMG-niň Modeli geçirildi.
Çäre Türkmenistanyň Russiýa Federasiýasyndaky Konsullygynyň (Astrahan şäheri) guramagynda Astrahan oblastynyň Daşary aragatnaşyklar ministrliginiň hem-de general-admiral F.M. Apraksiniň adyndaky Hazar deňiz we derýa ulaglary institutynyň goldaw bermeginde geçirildi. Duşuşyk «Hazar — Gündogaryň we Günbataryň arasyndaky köpri» atly tema bagyşlanyldy.
Çäräniň barşynda duşuşyga gatnaşyjylar sebit ösüşiniň geljegi baradaky soraglary ara alyp maslahatlaşdylar, hususan-da ulag-logistika mümkinçiliklerine, ekologiýa howpsuzlygyna, söwda-ykdysady hyzmatdaşlygyň giňeldilmegine hem-de medeni-ynsanperwer gatnaşyklarynyň pugtalandyrylmagyna aýratyn üns berdiler. BMG-niň Modelinde talyp ýaşlar özleriniň işjeňliklerini görkezdiler.
Duşuşygyň çäginde Astrahan şäherindäki ýokary okuw mekdeplerinde bilim alýan talyplar «Parahatçylygyň, howpsuzlygyň we ösüşiň hatyrasyna Bitaraplygyň dostlary toparynyň» agza ýurtlarynyň resmi wekilleriniň wezipesinde çykyş etdiler. Ýaş diplomatlar halkara gatnaşyklary babatynda öz bilimlerini we başarnyklaryny tejribede görkezmek arkaly wekil bolan döwletleriniň garaýyşlaryny beýan etdiler.
Mundan başga-da BMG-niň Modeline Eýran Yslam Respublikasynyň we Gazagystan Respublikasynyň Russiýa Federasiýasyndaky (Astrahan şäheri) Baş konsullary, Astrahan oblastynyň Hökümetiniň ýolbaşçylary gatnaşdylar hem-de öz ýurtlaryna wekilçilik etdiler.
ORIENT
