Türkmenistan we Katar diplomatik hem-de bilim ugurlarynda hyzmatdaşlygy ösdürýärler
Şu gün Türkmenistanyň Katar Döwletindäki Ilçisi M. Seýitmämedow Kataryň Daşary işler ministrliginiň Diplomatik institutynyň direktory Abdulaziz bin Mohammed Al-Horr bilen duşuşdy.
Duşuşygyň dowamynda türkmen tarapy Türkmenistanyň Hormatly Prezidenti tarapyndan 2025-nji ýylyň “Halkara parahatçylyk we ynanyşmak ýyly” diýlip yglan edilmeginiň giň halkara seslenme döredendigini belläp, bu başlangyjyň ýurdumyzyň içerki we daşarky syýasatynda öňe sürülýän ynanyşmak, deňhukuklylyk we özara hormat goýmak ýörelgelerine doly laýyk gelýändigini nygtady.
Taraplar Türkmenistanyň hemişelik bitaraplygynyň 30 ýyllygyna bagyşlanan halkara çäreler barada pikir alyşdylar we geçirilen hem-de meýilleşdirilýän wakalar baradaky maglumatlary paýlaşdylar.
Mundan başga-da, taraplar Kataryň Diplomatik instituty bilen Türkmenistanyň Halkara gatnaşyklary we diplomatiýa institutynyň arasynda baglaşylan Ähtnamany durmuşa geçirmek boýunça 2025–2026-njy ýyllar üçin Hereketleriň ýol kartasynyň çäginde hyzmatdaşlygy işjeňleşdirmegiň meselelerini ara alyp maslahatlaşdylar.
ORIENT
