Balkan welaýatynda şahyr Kerim Gurbannepesowyň 96 ýyllygy bellenildi
Ýatdan çykmajak şahyr Kerim Gurbannepesowyň doglan gününiň 96 ýyllygyna, şeýle hem Türkmenistanyň hemişelik Bitaraplygynyň 30 ýyllygyna bagyşlanyp, Balkan welaýatynda edebi döredijilik çäre geçirildi. «Halkyň söýgüli şahyry» atly çäre Magtymguly etrabynyň D. Öwlüýagulyýew adyndaky 13-nji orta mekdebiniň kitaphanasynda geçirildi.
Beýik söz ussatlary Kerim Gurbannepesow ýaly şahyrlar türkmen edebiýatynyň baý we belent ruhly hazynasyna uly goşant goşdy. Çäräniň maksady onuň ýagty hatyrasyny hormatlamak hem-de döredijiligini ýaşlaryň arasynda wagyz etmek boldy.
Duşuşykda zehinli okuwçylar şahyryň birnäçe goşgusyny joşgun bilen labyzly okap berdiler. Mugallymlar bolsa Kerim Gurbannepesowyň ömrüniň we döredijiliginiň möhüm pursatlary, goşgularynyň many-mazmuny barada giňişleýin gürrüň berdiler. Okuwçylar hem öz gezeginde şahyr barada berlen sowallara işjeň jogap berdiler.
Çäre milli gymmatlyklara, edebi mirasa hormat goýmagyň ähmiýetini nygtady, bu bolsa «Berkarar döwletiň Täze eýýamynyň Galkynyşy döwrüniň» ruhy taýdan aýrylmaz bölegidir.
ORIENT
